Tülü küüyünün liţeyidä yısıtmak sisteması lääzım diiştirilsin
Tülü küüyünün S. Ȇkonomov adına liţeyindä lääzım bütünnä diiştirilsin yısıtmak sisteması. Tertiplerin enilenmesi verecek kolaylık üüretim merkezinä taa ii uurda çalışmaa hem taa az yakacak harcamaa.
Üüretim merkezi çalışȇr 1973 yıldan beeri. Yısıtmak sisteması şindän sora eskidi. Makar ki o taa işler, kimär sıra patlȇr eski trubalar, da bununnan kimi zorlukları getirer hem harcanmakları düzmäk için.
Şindi liţeyin öndercilii barabar küüyun kuvetlerinnän hazırlȇȇrlar lääzımnı dokumentleri okulda yısıtmak sistemasını diiştirmäk için, haberledi primariyanın temslcisi Grigoriy Kula. Proektın paası ama taa diil belli.
«Regional ilerletmäk Agentstvosunda var grant, angısına görä var nicä verilsin en çok 10 mln ley. Biz ödedik lääzımnı dokumentaţiyanın hazırlanması için da ondan sora danışacez Agentstvoya”, — açıkladı Grigoriy Kula.”
Liţeyin başı Varvara Kemençeci urguladı, ani bütün sistema paklanıldı 2005 yılda, o zamandan beeri, bişey bu uurda yapılmadı.
«Şindi, açan odu kolayımız primariyaylan barabar pay almaa Regional ilerletmäk Agentstvosunun proektindä, biz sevinmeliklän buna kayıl olduk. Şükür ederiz primariyayı, ani ön plana aldılar yısıtmak sistemamızın diiştirilmesini. Deneyecez taramaa», — söledi liţeyin başı.
Liţeyda lääzım diiştirmää yısıtmak tertiperini, batareyaları hem trubaları taa zamandaşlara, deyni onnarın işi olsun taa ii hem da harcanmaklar yakacak için taa az.
«İsteriz okulumuz küüdä kalsın, uşaklar üürensinnär, küü dä ilerlesin», — söledi Varvara Kemençeci.
Büünkü gün Tülü küüyünün liţeyindä üürener 220 — dän zeedä uşak.
Источник grt.md
