Gagauziyanın üürenmäk kurumnarına etmeer para sıcaan ödemesi için
Gagauziyanın taa çoyu üürenmäk kurumnarı şansora harcadılar o finansları, angılarını plannadıydılar bu yıla sıcaan ödemesi için. Bunu açıkladı Gagauziyanın Üüretim baş bakannıın başı “Dialog v studiyi” programasında.
Gazın birdän paalılanması getirdi ona, ani regionun üürenmäk kurumnarında etmeer finanslar sıcak için ödemää. Gagauziyanın Üüretim baş bakannıın başı Natalya Kristeva nışannadı, ani kimi üürenmäk kurumnarı kapadılar borçları kazanç paraları için verilän paralardan.
“Taa çoyu üürenmäk kurumnarda 2022-ci yılın küçük ayında bu uura verilän paraların yarısından zeedesi harcandı. 10 üürenmäk kurumunda etmeyän paralar alındılar işleyennerin ay kazançları ödemesi için finanslarından”, — söledi Natalya Kristeva.
Dezgincä küüyündä kurumnarı yısıtmak için 2021-2022 üürenmäk yılında plannandıydı 170 000 ley harcamaa, ama mart ayında onnar şansora bittilär. Gazın paalılanmasınnan primariya her ay sade sıcak için harcȇr 80 bin leyä kadar.
“Büünkü günädän biz hepsi paraları harcadık. Bir ayda bizä geler 80-85 bin ley ödemää. Bän sanȇrım, ani bu soruşu lääzım bakmaa maasuz toplantılarda hem çalışmaa çıkmaa bu problemadan, çünkü uşaklar diil kabaatlı, onnara lääzım sıcak olsun”, — söledi Dezincä küüyünün primarı Vasiliy Kapsamun.
Gagauziyanın Üüretim baş bakannıın başı nışannadı, ani bu problemayı Moldovanın Hukumedi lääzım alsın esaba.
“Gagauziyanın Bakannık komiteti başkannan barabar işletti hem yolladı MD Hükümetinä bir dokument, angısında teklif ediler vermää bu uura etmeyän finansları. Bu iş çoktan lääzımdı yapılsın. Var umut, ani bu soruşu bakaceklar, da sıcaan ödemesi için etmeyän paralar verileceklär”, — söledi Natalya Kristeva.
Üürenmäk kurumnarında gazın ödemesi için etmeyän finansların verilmesi iniţiativasını Gagauziyanın başkanı İrina Vlah Moldova Hükümedinä taa yılın çeketmesindä verdi.
Источник grt.md
