Video: Gagauziyanın okulların diil hepsindä verildi sıcak
Avtonomiyanın uşak başçalarına sıcak şansora verildi, ama liţeylär hem gimnaziyalar taa diil hepsi isıdılȇrlar. Onnardan sade 8-zi isıtmak sistemalarını çalıştırdılar, 38 -dä — diil. Normalara görä, klaslarda temperatura olmaz düşsün 18-20 gradustan aşaa.
Komratta şindiki zaman Nikolay Tretyakov adına liţeyi canavar ayın 11-dän isıdılȇr. Başka üüretim kurumnarında katölları alatlamȇȇrlar çalıştırmaa, haberledi Komrat isıtma sistemaları kurumun başı Vadim Barbanägrȇ.
«Kalan liţeylär istämedilär taa sıcak verelim. Kurumnarın başları söledilär, ani onnarda sıcak, da uşaklar kısa ennän gezerlär. Ama bän bilerim, ani onnarın üüretim kurumnarında diil okadar sıcak ,nekadar onnar söleerlär», — söledi o.
Vadim Barbanägrȇ sayȇr, ani üüretim kurumnarı butakım savaşȇrlar ekonomiya yapmaa.
Biz danıştık D.Karaçoban adına liţeyin çorbacılık uurunda başın yardımcısına İgor Tabakarä. O nışannadı, ani yısıtmak sisteması hazır, ama binada şindi onsuz da sıcak.
«Suuk olduynan, biz elbetki kotölları işledecez. Uşaklar pençereleri açȇrlar. Okulda şindi sıcak. Kabinetlarda 22-23 gradus», — haberledi İgor Tabakar.
Valkaneş kasabasının Doljnenko adına liţeyindä dä isıtmaa başlamadılar. Bu üüretim kurumu primariyanın isıtmak sistemasından sıcaa kableder. Liţeyin öndercisi bekleer karar primariyadan, nışannadı üüretim kurumun başı Larisa Bozbey.
«İçändä 18 gradus sıcak. Dışarda da taa diil pek serin. Biz baalıyız primariyaya. Adetçä çekederiz yakmaa canavar ayın 15-dän», — söledi kurumun başı.
Çadır-Lunga muniţıpiyasının Moşkov adına liţeyin başı Tatyana Kıvırjik haberledi, ani onnarın üürerim kurumu canavar ayın 7-dän isınȇr.
«Dışarda suuktu,korktuk, ani uşaklar hastalanacȇklar. Klaslarda temperaturayı bakmadık. Ama duyduk,ani suuk . Geldik bir karara çeketmää yısıtmaa», — söledi Tatyana Kıvırjik.
Hepsi üüretim kurumnarın var bücetleri, angılarını onnar harcȇȇrlar kendi esabına görä. Karar nezaman başlamaa isıtmaa buna baalı. Ama normalara görä, klaslarda temperatura olmaz düşsün 18-20 gradustan aşaa. Geçän yıl herbir üürerim kurumunda yısıtmak zamanı canavar ayın bitkisindä başlamıştı.
Источник grt.md 12.10.2021