Tarakliya kasabasında enilenmiş parkın şannı açılışı oldu
Kıran ayın 3-dä Tarakliya kasabasında geçti Yuriy Gagarin adına parkın açılışı düzmäk işlerindän sora. Kasabanın yaşayannarına hem musaafirlerinä kurucular hazırladılar yortulu programayı.
Tarakliya kasabasının yaşayannarı şükür ederlär hepsini, kim çalıştı bölä gözäl park onnnarın yaşamak erindä olsun. Düzmäk işlerindän sora kasabanın merkez parkı taa da gözelleşti.
«Parkımız pek gözäl oldu, bän beendim, saa ol söleerim bizim primara».
«Biz pek sevineriz bu proektä, bizim kasaba ilerlesin isterim. İnsannar, kim gelecek, tanıyamayaceklar bizim parkımızı, biz buna sevineriz».
«Saa olsun primariya, pek gözäl park oldu. Şindi pek önemli, ki gençlär korusunnar bunu, ki biz hepsimiz koruyalım, ne yapılêr bizim kasabaya deyni».
Düzmäk işlerini Tarakliya kasabasının primariyası başladı yazın, bütün park diişti. Enilendi oyun meydanı, koyuldu eni şılaklar, bütün parkın alanında diişildi trotuarların üstü, koyuldu eni skemnelär. Bu büük hem bekleyän bir proekt Tarakliya kasabasının her bir yaşayanına, nışannadılar onnar.
«Biz pek sevineriz, ani alabildik bu parkı, çünkü bitki vakıtlar hava durumu bizä braamardı bu işi yapmaa. Bän sanêrım, ani bu büük hem önemli proekt Tarakliya kasabasına deyni. En önemli, ani insannar beener, bu pek islää», — söledi Tarakliya kasabasının primarı Väçeslav Lupov.
«Büün Tarakliya kasabasının yaşayannarı kablettilär eni, düzülmüş parkı, angısı bän sayȇrım, pek gözäl. Bän burayı çok keret gelärdim düzmäk işlär gidärkana, şindi işlär bittiynän gördüm, ani pek gözäl. Bu bir baaşış gibi her bir yaşta insannara», — söledi Moldova Parlamentinin deputatı Vadim Fotesku.
Eni yıldan sora Tarakliya kasabasının primariyası umutlanêr başlamaa düzmää taa bir büük parkı.
Avtor: O. Duloglo, video: L. Arfanos
Источник grt.md
