Moldovada gaz gene paaya kalkêr
Molodvada harman ayın 1-dän gazın paası kalktı $1458,5 1000 м3. Bölä haberi kendi telegram kanalında yayınnadı Moldovagaz kurumun başı Vadim Çeban. Birkaç gün geeri da Gagauziyanın Bakannık komiteti kararladı paaların üüselmesi beterinä zeedeletmää yaşayannara kompensaţiyaların sayısını kış vakıdı için.
Harman ayın birindän yaşayannar başladılar ödemää gaz için 22 ley 26 ban. Taa ileri Moldovagaz istedi Energetika tariflarını kontrol edän agenstvosu (NARȆ) kaldırsın paayı 30 leyä kadar 1 kubometra için. Orak ayından gazın satış paası kurdu 980 dollar 1000 kubometra için. Kışın Evropada paalar var nasıl kalksınnar 3000-4000 evroyadan, yazȇrlar evropadakı mass -media kurumnarı.
“Alarak esaba annaşmanın bölümnerini, angısını “Moldovagaz” imzaladı “Gazprom” kurumunnan harman ayında, paa gaz için Moldovaya deyni kuracek 1458,5 dolar 1000 kubometra için”, yazdı Vadim Çeban.
Paalar hem tariflar için gaz mallarına annaşêr Rusiyaylan Moldovanın kuvetleri. Şindiki koşulları kurdu Rusiyaylan Moldovanın infrastruktura ministrusu Andrey Spınu, imzalayarak sözlemeyi “Gazpromlan”. Alarak esaba ödekleri gaz için, o kuracek 1458 dollar, ozaman yaşayannara sıra gelecek ödemää 40 leyä kadar. Ama var haberlär, ani kışın paalar kalkaceklar 3000-4000 evroyadan bin kubometra için, ozaman sıra gelecek ödemää 100 leyä kadar. Moldovanın taa çoyu yaşayannarı sayêrlar, ani ödeyämeyeceklär gazı. Vatandaşlar söledilär, ani Maya Sandu kendi lääzım gitsin da annaşsın Rusiyaylan gaz için.
“Biz bileriz, ani Evropada da paalar üüsek”.
“İnsannar hep okadar bişey yapamayaceklar. Develt uurunda kararladılar, ölä da olacek”.
“Pek prost, ani Ukrainada cenk, ama onnarda paalar 3-4 okadar taa iisik, nekadar bizdä. Satın alêrlar Ukrainadan şafkı, ama Moldovanın var kendi sızıntıları, ama almêêrlar. Belli, ki Amerika elçisindän alêrlar. Bu politika sade”.
“Lääzım dost olalım Evropaylan, Amerikaylan hem elbetki Rusiyaylan. Hem lääzım satın alalım o paada, angısını biz isteeriz, da karşı koymamaa Rusiyanın başına. Belli, ki Sanduya ödemiş Amerika, da o yapêr ne onnar deerlär”.
“Paalı, ama yok ne yapalım, bizi hiç sormêêrlar da. Alacez Rumıniyadan, onnar sanêrlar taa ucuz olacek, ama olmayacek. Lääzım iildip kahalarını annaşsınnar Gazpromlan, Moskvaylan”.
“Diil lääzım otursunnar odalarında, ama kalksınnar da gitsinnär annaşsınnar Rusiyaylan”.
Alarak esaba gazın paasını Gagauziyanın Bakannık komiteti kararladı üüseltmää kış vakıdı için kompensaţiyaları 200 leyädän.
İRİNA VLAH, Gagauziyanın Başkanı: “Tayana Mihaylovna teklif etti kaldırmaa kompensaţiyaları kış vakıdı için yakın 60%, o üzerä hazırlayınız yazıları, ani sizdä var, da belli olsun, kim kabledecek hem hepsi kolaylıkları ki geliştirmää bu programayı”.
Kaldırmaa kompensaţiyaları yakın 60% karar kabledildi Bakannık komitetin oturuşunda orak ayın 29-da, ozaman gaz satın alınardı 980 dollara, şindi sa harman ayın 1-dän paa kalktı birdän da kurdu 1458,5 dollar 1000 kubometra için.
Getirderiz aklılarınıza, ani bıldır “Moldovagaz” hem “Gazprom” canavar ayın 29-da uzadılmış annaşmalardan sora uzattılar annaşmayı kasım ayın 1-dän 5 yıla. Gazprom nışannadı, ani alarak esaba Moldovanın durumunu, kararlandı imzalamaa annaşmayı, ama koşullan, ani ödeyecek Molodva 100% gazı vakıdında.
prevyu: np-vesti.ru
Источник grt.md
