23.09.2021 GAZ PAASININ BÜÜMESİ HEM DEVLET TARAFINDAN YARDIM
Bitki günnär paalar gaza Evropada üüseldi okadara nekadar hiç bir dä sıra yoktu. Kısa vakıtta birjada o büüdü 950 dollarakadar bir kubometra için. Analitiklerin çoyu düşünerlär, ani bu paalar ileri dä başlayacek pinmää yukarı. Nesoy sebeplär buna hem neyi Moldovanın yaşayannarı bekleer, bizim materialımızda.
«Моldovagaz» yakınnarda energetika malların paasını doorudan Milli agenstvosuna energetika malların paasını 35 proţenda büültmää deyni tekliflän danışacek. Bunu ceviz ayın 17-dä kurumun başı Vadim Çeban haberledi.
«Er tarifın paası güzün 35 proţenda büüyecek, ozaman insana deyni bu mal 6 leyäkadar bir kubometra için var nasıl üüselsin. Annaşmaklar gazın gelmesi için Rusiya devletindän Moldovaya şindän sora imzalandı. Kaldı kararlamaa sade angı vakıdakadar o uzanacek», — açıkladı Vadim Çeban.
Vadim Çeban urguladı, ani gazın paası, angısı teklifedildi Moldovaya, uygun.
Gazın paalılanılması var nasıl köstek etsin kimi kurumnarın işini, kimi var nasıl heptän kapansın, sayȇr devletin eks-prezidenti İgor Dodon. Moldovanın soţialist partiyası çiktı tekliflän yardım etmää insana kompensaţiyaları verip.
«Biz teklif ettik baktırsınar soruşu ki kullanılmış gazın ilk 100 kubometrasının ödemesi için kompensaţiya gibi devlet yardım etsin. Moldovada ortada 200 kubometra ayda bir ev harcer. İnsan ilk 100 kubometrayi eski payına görä lääzım ödesin», — açıkladı Soţialist Partiyasının başı.
İgor Dodonun laflarına görä, kanon proekti şindän sora hazır. Bu neetlerä devlet her ay lääzım olacek büdjettan yakın 5 milion ley versin.
Annaşmak Rusiya hem Moldova devletlerin aralarında yılın bitkisinädän işler. Bu sıra annaşmaklar Gazprom kurumunnan baalı gaz mallarınnan devlet kuvetlersiz geçtilär.
Источник grt.md
