Video: Yaşayannar bekleerlär kompensaţiyalari gaz için
Moldovanın hükümeti hem Rusiyadakı “Gazprom” imzaladılar annaşmayı 5 yıla gazın satın alması için. Kontraktın bir koşulu sade var — Moldova lääzım ödeşsin borçlarınnan. Annaşmanın çerçevesindä belli edildi bir formula, angısını teklif etti Moldovanın delegaţiyası. O baalı panayırda paalarlan gaza hem petrol mallarına. Dual gazın paaları kalkacȇklar yakın zamannarda, bu işlär için Moldovanın kuvetleri şansora aşıkladılar. İnsannar umutlanêrlar, ani kompensaţiyalar da ödeneceklär.
Gazın paalarını kaldırmasından sora zeedeledeceklär yaşayannarın harçları da.Onnar bekleerlär hükümettän kompensaţiyaları gaz için.
“Biz umutlan bekleeriz, ama olacȇk mı, osa olmayacȇk, onnar diil belli. Elbetki bekleeriz hükümettän ödekleri bu problema ilk uurda”.
“Bän kendim beklämeerim, çünkü pensiyam 2 000 leydan zeedä, da vermeyeceklär, ama kimin taa iisik, onnar ne yapsınnar?”
«Biz siirederiz haberleri, da adêrlar, ani olacȇk, ama düşünerim, ani olmayacȇk, çünkü bu dertlärlän çıkamayacȇz».
«Elbetki bekleeriz, çünkü çoyunda yok iş hem ay kazanç ödekleri».
«Bekleeriz kompensaţiyaları kış vakıdı için, olacȇk pek zor».
«Bekleriz nezaman haberleyeceklär belli paayı gaz için. Annamadık ne saklılıklar butakım, neçin haberlämeerlär paaları».
«Elbetki bekleerim, bän pensiyaylan yaşayamayacam».
İnsannar sevinerlär, ani gaz için kontrakt imzalandı, da bu zorluklardan kurtulduk.
“ Saa olsunnar, ani zar-zor ama imzaladılar bu annaşmayı. Bän kendim Rusiyadanım, da pek isterim Moldova Rusiyaylan dost olsunnar, nicä da ilerki zamannarda. Rusiyada var büük zenginniklär gazlan da, kömürlän da”.
Moldovaya eni kurulmuş kontrakta göra gaz satılacȇk kasım ayın 1-dän. Taraflar annaşmayı imzaladılar paaların formulasına görä, hem geçirip audit borçlarda, angıları yıllarca toplandı Moldovagaz kurumunda. Gelecek zamanda lääzım kurmaa ödeklerin grafiini. Hep ölä kuruldu paanın esaplamak formulası, angısını teklif etti Moldova tarafı.
ANDREY SPINU, Moldovanın infrastruktura ministrusu: “Bakarak şindiki panayır paalarına, var nasıl söleyim, ani kasım ayında gaz paaları kuracȇklar 450 dollar 1000 kubometra için. Sora paalar düşeceklär kıran ayında, aardılıp gaz paalarına birjalarda, da paalar var nasıl insinnar 400 dollaradan 1000 kubometra için. Bu vakıtta bölä paalar iki okadar taa küçük onnardan, angılarını biz ödedik canavar ayında. Bitki kullanıcılara deyni gazın paası da üüselecek, çünkü valüta paaları diişilerlär”.
Energetika uurunda ekspert nışannadı, ani gazın paasına hep öla katılacȇk eklenilmiş vergilerin sayısı da. İisiltmää deyni insannarın harçlarını gazın ödemesi için, Moldovanın hükümeti lääzım kursun kompensaţiyaları fukaara vatandaşlara deyni, sayȇr Sergey Tofİlat, ênergetika uurunda êkspert.
İmzalanmış kontraktta baş koşulların biri — Moldova ödeşsin borçlarınnan Gazpromun önündä. Nicä haberledi energetika eksperti Sergey Tofilat, bu ödünçlär diil lääzım duyulsunnar kullanıcılarlan.Toplanılmış yıllarca ödünçlär ödeneceklär baamsız audittan sora, angısını geçirecek baamsız kompaniya Moldovagaz kurumunda.
Источник grt.md
