«Paalar üüsek. Sade yanından geçeriz». Komratlılar zarzavatlara hem meyvalara paalar için sezonun ortasında
Bakmayarak ona, ani zarzavatların hem meyvaların vakıdı, paalar pek üüsek. Bir kila patlıcan için yaşayannar büün öderlär on iki leydän irmiya kadar, hıyarları satın alêrlar on iki – on beş leyä, sarmısak için vererlär elli ley. Komrat kasabasının merkez panayırında insannar sakınnaşıp ta alêrlar karpuzları.
Satın alannar aalaşêrlar, ani bu yıl paalar pek üüsek, ne baalı kuraklıklan hem sıcak yaz vakıdınnan, neyin beterinä bereket tä iisik oldu. Moldovanın yaşayannarı nışannadılar, ani çok bekledilär yaz vakıdını, ki imää meyva hem zarzavat, ama üüsek paaların beterinä vitaminnar için söz da gitmeer.
“Bölä üüsek paalar, sade yanından geçeriz. Hepsi paalı: zarzavatlar, patlıcannar, hıyarlar, laana. Var mı nasıl kapayalım onnarı kış için hem bukadar para verelim onnar için? Bilmeerim nesoy kışlayacez”.
«Zerdeli aldım, ama pek paalı — 15 ley. Hepsinä zor, bizä da».
«Nevar ne söleyim, paalar pek üüsek, diil her gün, ama her saat büüyerlär. bilmeerim nesoy ötää dooru yaşayacez».
«Açan pek lääzım, sade ozaman alêrız, ama ne kış için hazırlayacez bilmeerim. Yok neylän hiç almaa da».
«Bakarak nesoy kuraklık, paalar diil pek üüsek, taa ucuz da olamaz, çünkü yok bereket hem onnarı büütmää harçlar da büüdü».
«Paalar zarzavatlara pek paalı 15-20 ley, nesoy insan yaşayacek».
«Satın alêrım 2-3 sefer aftada, paalar pek üüsek. Bakarak bıldıra pek paalı. Ne düşünerlär yukarda? Nesaydı lääzım yapılsın, etmeer en lääzımnı işlerä bilä”.
«Pek paalı bizä deyni, ne yapacek başkaları?»
Bakmayarak kuraklık vakıdına başladılar satılmaa karpuzlar. Onnarın bir kilası 6 ley. Bahçvancı Sergey Dimitroglo satêr karpuzları her gün 500 kilayadan. Onun var karpuzlan ekili 3 ektarı.
SERGEY DİMİTROGLO, çiftçi: “Bu yıl zor büütmää, kuraklık. Kim da satın almasa bendä, herkezi beendi. Birkimsey taa aalaşmadı”.
Taa çoyu yaşayannar dikatlı satın alêrlar karpuzları, çünkü taa çoyu dolu nitratlan.
“Korkunçlu satın alêrım, çünkü 2 gün geeri unukam otalandı onnarlan, biraz dikatlı lääzım olalım”.
İmek malların kalitesini kontrol edän agentstvosunun başı Mihail Tukan nışannadı, ani alarak karpuzları lääzım dikkatlı olmaa. Uzmannar nışannadılar, ani almaa lääzım onnarı maasus belli edili erlerdä.
MİHAİL TUKAN, İmek malların kalitesini kontrol edän kurumun başı: “Hepsiçi çiftçilär angıları bulunêrlar Gagaziyada, danışêrlar bizim bölümüzä, ki kabletmää dokumentleri. İsteerim teklif etmää hepsi satın alıcıları istesinnär o sertifikitları satıcılardan. Ama varsadı şüpeleriniz mallar için, satın almayınız onnarı”.
Bu yıl karpuzlan otalanmak olaylarınnan taa biri da danışmadı Komrat dolay bolniţasına. Ki otalanmamaa emişlerdän Nina Raylän teklif etti karpuzları satın almamaa biraz taa sora.
NİNA RAYLÄN, Komrat dolay bolniţasının başı: “Karpuzların sezonu taa gelmedi. Harman ayın bitkisindä sade var nicä almaa onnarı, yakın ceviz ayın çeketmesinä. Sade ozaman var nasıl onnarı imää”.
Alarak esaba uzamış kuraklık vakıdını hem su etmemesini, meyvalara hem zarzavatlara paalar bezbelli inmeyeceklär.
Источник grt.md
