Kompensaţiyalar için danışmış insannarın 70%-tän zeedä “pek üüsek” hem “üüsek” yufka kategoriyalarda
Compensatii.gov.md platformasında yazılmış yaşayannar başıladılar yufka kategoriyasını üürenmää. Ona görä vatandaşlar kabledeceklär kompensaţiyaları gaz, şafk hem sıcak için.
Ȇnergetika uurunda kendi yufka kategoriyasını üürenmää deyni, angısına görä gaz, şafk hem sıcak paaların bir payı devlet tarafından ödenecek, nicä bildirdiydilär kuvetlär, vardı nicä Kasım ayın 30-da. Ama aslı bunu insannar yapabildilär sade Kıran (dekabr) ayın 1-dä.
«Bän dün savaştım girmää hesabıma”.
«Tä şindi giderim üürenmää angı kategoriyayı bana verdilär».
«Platforma pek üklü da onuştan ona pek zor girmää. 700 bin dsanışmak o pek çok. Da allelem programa etiştirämeer hepsi girişleri işlemää”.
«Bän taa bakmadım».
Ki üürenmää sizä verilmiş yufka statusunu lääzım girmää compensatii.gov.md saytında kendi hesabına. Girdiynän saa tarafında görünecek yalın simbolu, insandan insana o türlü renklerdä var nicä olsun. Kırmızı göstrerer pek üüsek yufka kategoriyasını, turuncu – üüsek, sarı – orta, eşil – iisik, mavi – yufkasız.
Uzmannarın esaplamalarına görä kompesaţiyalar için danıştışar 700 bin evin saabisi, angılarından 78% -di pek üüsek hem üüsek yufka kategoriyasıda. Haliz te onnara şafk paasının bir payı ödenecek devlet tarafından.
«Er şafk büüyarsaydı 6 leydän zeedä, kompensaţiyalar verilecek yaşayannara orta yufka kategoriyasından da. Geçmiş afta kabledilmiş kompensaţiyaların reglamentı baktırȇr 3 sţenariy: 1).paa 5 leyadan kalarsaydı, 2). 5-tän 6-ya kadar hem 3). er kalkacek 7 leyadan. Ama er 7 leydän taa paalı olarsaydı, ozaman hükümet başka karar kabledecek. Ama umutlanȇrım ki bölä olmayacek”,-söledi iş hem soţial uurunda korumak ministrusu Marçel Spatar televizion yayınnarın birindä.
Er aylä isınȇr sade şafklan, ozaman kompensaţiyanın en çok sayısı diil 75 kVt/saat için, ama 1000 kilovat için verilecek.
Gaz için kompensaţiya hep ölä baalı verilmiş yufka kategoriyasına. En üüsek kategoriyasına gaz 12 ley olacek, üüsek kategoriyası için 14 ley, orta – 17 ley hem iisik – 24 ley bir kub için.
Kompensaţiya kaplayacek maksimum 180 kubu ayda.
Bununnan birerdä insannar, kim compensatii.gov.md saytında danışmasını brakmadılar, gaz, şafk hem sıcak için kompensaţiyaları Kasım ayı için kabledeceklär nicä insannar orta yufka kategoriyasından. Ama sade bir ay için. Kıran ayından beri onara kompensaţiya olmayacek.
Bu ara verilmiş yufka kategoriyasınnan diil hepsi insannar kayıl. İş hem soţial uurunda korumak ministerliin presa izmetindä haberledilär, ani çok insan kayıl olmadıını belli etti. Butakım kayıl olmamış insannar lääzım bu ministerlää danışmayı yollasınnar [email protected] adresinä, da uzmannar enidän bakaceklar hepsi bilgileri, açıkladı İş hem soţial uurunda korumak ministerliin presa izmetinin başı Diana Blanaru.
Bu yıl gaz, şafk hem sıcak için kompensaţiyaları ödemää deyni hükümet ayırdı 5 mlrd ley, ne 2 kat taa çok nekadar 2021 yılda.
Avtor: M. Statova, çevirdi: O. Kihyal, çekim: F. Çakusta, kurgu: M. Kazaku
Источник grt.md
