Kıpçakta gösterildilär iki moldovadakı film „İlie” hem „Tolä Niku”
Kıpçak küüyün kultura evindä gösterildi „İlie” hem „Tolä Niku”, filmleri angılarını «BessarabKino” studiyası çıkardı. Bizim kollegalarımız üürendilär aktörlarldan, ne en pek meraklandırdı siiredicileri.
„İlie” hem „Tolä Niku” filmleri «BessarabKino» studiyası çıkardı, ki insannarın kaavi ruhunu, onnarın yaşamalarını Büük Vatan cengi vakıdında göstermää. Filmin kurucusu Yakov Gribinenko annattı, neçin o kendi kollektivınnan bölä janrada filmı istedi çikarmaa.
«Düşündük yapmaa bölä filmleri, neçinki var çok insannarın kaderleri, angıları unuduldu. Var çok istoriya o çirkin cenk için, angıları gösterilmedi, angıları için annadılmadı. Insannara lääzım annatmaa, çünkü bölä istoriyalarda vaar büük teerbi etmäk kuvedi. Taa önemli, ani biz annadêrız hem göstereriz insannar için, angıları Moldva taraflarında duudu», — açıkladı Yakov Gribinenko.
Budjetsız, sade insannarın istemesindä zoor çıkarmaa filmleri, annadêr Yakov Gribinenko. Ama o seviner, ani toplandı insannar, kim onun bakışlarınnan kayıl kimää önemli bölä temayı açiklamaa.
«Biraz zoordu, neçinki hepsini yaptık kendi kuvetimizinnän. Ama beni sevindirer, ani yanımda var insannar, kim kayıl oldu benim bakışlarımnan, kim kayıl parasızda işlemää. Onnar giderlär ardıma, yaardım ederlär, onuştan biz bitkiyadan bu işleri getirdik, sedece kollektivın kuvetlerinnän», — söldi filmlerin kurucusu.
Aktör Stanislav Binkovskiy sayer, ani önemli annatmaa insannara cenk vakıtlarçin. Ķüçüü da, büüyü da lääzım bilsinnär hem aklında tutsunnar istoriyayı.
«Önemli göstermää insannara ne olardı o vakıtlarda, var çok terbiyedän momentlär. Gösterildi, ki küçüklär da, büüklär da, görüp onnarı, kendinä deyni sayıklasınnar, nicä yapaceydı onnarın erindä», — söledi aktör.
Filmlerin çıkarmasında pay aldı Kıpçak küüyün yaşayanı da Stanislav Baboglo.O nışannadı, ani bölä filmlär teerbi ederlär insannarı her bir taraftan.
«Bence bölä istoriyalar da, neredä var kahramannar, insannar, angıları koydular kendi yaşamasını bizim memlekedi korumaa deyni, onnar önemli. Bizi ii uurda tutmak için, biz kendimiz içimizdän daalmayalım, çetin olalım», — nışannadı Stanislav Baboglo.
Aktörlar umut ederlär, ani her keret taa çok siiredici gelecek bakmaa filmleri, neredä bizim istoriyamız açıklanêr. Ileriya dooru da „İlie” hem „Tolä Niku” filmleri gösterileçek Moldovanın kasabalarında hem küülerindä.
Источник grt.md
