Video: Kıpçakta andılar 1946-47 yıllarda aaçlıktan ölmüş küülüleri
Kıpçak küüyündä geçti olay, baalı aaçlık vakıdına 1946-47 yıllarda. Aaçlık kurbannarın günü Gagauziyada canavar ayın 19-da bakılêr 2019 yıldan Halk Topluşun kararına görä.
Kıpçak küüyündä 1946-1947 yıllarda aaçlıktan 2-binädan insan öldü. Yaşayannar, kim atlattı o çirkin vakıtları, paylaştılar aklına getirmelerinnän, nesoydu yaşamak ozaman. Annadarkana o kahırlı vakıtlar için, onnar zorlan tutardılar yaşlarını. Onnar isteerlär, ki dünnedä zeedä bölä çirkin vakıtlar olmasın.
PANTELEY YANULOV, Kıpçak küüyün yaşayanı: “Vakıtlar zoordu, hepsi aaçtı, herersi daanıktı, askerlär da aaçtılar, diil sade biz. Pek aazdı imek, porțiyalar küçüktülär”.
Kıpçak küüyün kultura evin yaradıcılık uurunda uzman Dina Çeavdar yaptı buluşmayı kıtlıı atlatmış yaşayannarlan. O nışannadı, ani pek önemli seslemää insannarı, angıları geçirmişlär o zamannarı.
DİNA ÇAVDAR, Kıpçak küüyün kultura evin uzmanı: “Biz savaştık bulmaa da çaarmaa insannarı, angıları geçirmişlär aaçlıı. Bu bizä deyni pek önemliydi. Onuştan yaptık büün bölä olayı, aandık bu günü, açıkladık aaçlık temasını”.
Kıpçak klisesinin popazı Vitaliy Zelinskiy nışannadı, ani pek önemli unutmamaa istoriya sayfalarını, annatmaa evlad boylarına o kahırlı günnär için.
VİTALİY ZELİNSKİY, Kıpçak klisesinin popazı: “Dolu içim duygularlan, nekadar da işideriz, nekadar da annadêrlar, herkeret düşünerim, annadık mı biz o kahırları. Hazırız mı biz annamaa o vakıtları, içimizdän geçirmää o duyguları. Bizä deyni pek önemli unutmamaa o vakıtları, bilsinnär gençlär dä”.
Üüredici Mariya Kopuşçu nışannadı, ani o vakıtlar dill lääzım unudulsun, gençlerä lääzım annatmaa aaçlık için.
Ürenicilär, angıları olayda pay aldılar, kendi fikirlerini hem duygularını annattılar
Aaçlık kurbannarın anmak günü nışannanȇr avtonomiyada 2019 –cu yıldan Gagauziyanın Halk topluşun kararına görä.
Источник grt.md
