Kıpçak küüyünün yaşayannarı barabar pakladılar küüyünün dolayını
Kıpçak küüyünün yaşayannarı pay aldılar «Yapacez bizim küüyümüzü taa pak» akţiyasında. Hepsi çıktı kendi payını koymaa bu önemli iştä.
«Yapacez bizim küüyümüzü taa pak” akțiyasında oldu gözäl hem önemli bir adet Kıpçak küüyündä. Paklamaa kendi küüyünü çiktı hepsi: uşak başçaların, kultura evin, primariyanın, şkolaların, «Pobeda» Kolhozun çalışannarı. Her bir insan isteer pak küüdä yaşamaa.
«Bugün biz çiktık paklamaa küüyün dolaynı, neçinki göreriz, ani küüdä vaar çok gübür. Sıbıdȇrlar insannar, onnarı hepsini yapêrız biz, onuştan biz kendimiz da lääzım onnarı toplaylım. Biz lääzım örnek olalım gençlerä, küçük uşaklara, hepsinä. Onnar da bilsinnär, ani bizim yaşadıımız duuma erimiz lääzım olsun pak», -nışannadı Elena Orlioglo, 2-ci uşak başçasında üüredici.
«Lääzım hepsicii baalansınnar bu akţiyaa, çiksınnar hepsi, zerä bunu biz yapêrız bizä deyni, bizim uşaklarımıza deyni, analara, bobalara ,dädulara, malilerä, bu soluklan biz hepsimiz soluyerız», — söledi Olga Kazanji, 3-cüuşak başçasında üüredici.
İnsannar danıştılar kendi küüyünün yaşayannarına onnar korusunnar küüyünü, sayısınnar kendi hem yandakı kişilerin işini.
«İsterim danışmaa, ani çiksınnar, paklasınnar , gübürlerini sıbıtmasınnar yarlara. Biz lääzım evlat boylarına brakalım pak topraa», — nışannadı Anna Kopuşu,kultura evin başı.
Kıpçak küüyünün primarı Oleg Garizan şükür etti hepsi yaşayannarı, kim çiktı da pay aldı akţiyada. O çizgiledi, ani pek önemli korumaa Tabiyatı bizä deyni hem evlat boylarına da.
«Büün bän pek sevindim, ani bu iş oldu. İnsannar gördüm ani annȇȇrlar , ani bu işlär lääzım olsun. Biz lääzım annayalım , ani küüyümüz pakkana, bizim da saalımız olacek», — söledi Oleg Garizan.
Bölä akţiyalar geçer Kıpçak küüyündä dayman en az iki sıra yılda. Kimsey kalmêr bir tarafta, hepsi çikêr yapmaa kendi küüyünü gözäl hem pak.
Источник grt.md
