Kıpçakta yapılan daa sıraları eniletmäk işlär şüpelendirdilär küüyün yaşayannarını
Kıpçak küüyündä yol boyunda daa sıralarını enilederlär. Bununnan diil kayıl kimi yaşayannar. Küü aksakalları soveti yazdı danışmayı Gagaziya ekoogiya inspekţiyasına. Şindi bu kurum durumu aaraştırȇr.
2020 yılda Kıpçak küüyün primariyası başladı proektı, angısına görä daalar Kıpçak küüyündä enilenerlär. Kıpçak küüyün Aksakalların nasaatı hem kimi yaşayannar isteerlär annamaa, kanona görä mi bu iş yapılȇr.
ULYAN KOPUŞU, Kıpçak küüyün Aksakalların nasaatın öndercisi: «Aksakalların nasaatı danıştı ekologiya inspekţiyasına, da büünkü gün inspekţiya geldi bizim küüyä bizim soruşu çözmä deyni. Onuştan biz geldik burayı».
VADİM FUÇEDJI, Kıpçak küüyün yaşayanı: «Bu soruşu kaldırdım bän, niçä insan, angısı yaşȇr küüdä, çalışêrım kolhozda ürist. Bu informaţiyayı bän verdim bizim aksakallarımza. Bän istedim yardım etmä bizim aksakallarımıza, ki bilä barabar çözelim bu problemayı. Ne var bizim topraamızda, lääzım kalsın bizdä, bizim insana».
Ekologiya agentstvosunun başı Evgeniy Şevçenko nışannadı, ani cuvap verilecek aaraştırmaktan sora.
EVGENİY ŞEVÇENKO, Gagauziyanın Ekologiya agentstvosunun başı: «Bizä danıştı Kıpçak küüyün yaşayannarı, ki biz bakalım bu işin dooruluunu. Onun için biz geldik burayı, saydık aaçları, angıları kesildi, hem angıları lääzım kesilsin. Baktık nekadar dooru yapıldı işlär, neçinki dooru kesmedän ileri dooru aaç büümeyecek. Başardıynan hepsi işleri, informațiya yollanılacek insannara, kim danıştı bizä hem Kıpçak küüyün primariyansına».
Gagauziyanın Çiftçilik bakannıın öndercisi Andrey Dimitroglo kendi bakışını açıkladı bu iş için.
ANDREY DİMİTRİOGLO, Gagauziyanın Çiftçilik bakanı: «Aaçlar lääzım her keret vakıdında enilensinnär, angıları çoktan dikili. Kıpçak küüyündä aaçlar 50 yıl diişilmemiş. Onnarı diiştimärsäydilär, ötää dooru aaçlar büümeyecek, sora zor onnarı kurtarmaa».
Kıpçak küüyün primarı Oleg Garizan nışannadı, ani işlär yapılêr Moldova kanonnarına görä.
OLEG GARİZAN, Kıpçak küüyün primarı: «Bizä kimsey danışmadı bu işlär için. Biz hepsi işleri kanonnara bakarak yapêrız. Kabledip hepsi dokumetleri, enilederiz bizim daaları, angıları pek çoktankı. Bizim nasaatımızda kanonnara görä ayırdık, angı daaları diiştirecez».
Kıpçak küüyünda var 160 km yol boyunda aaç sıraları. Onnarın enilenmesi geçirilecek 9 yılın süresindä.
Источник grt.md 14.03.2022