Kıpçak küüyü kabledecek taa bir partiya mramor Türkiya devletindän
Kıpçak küüyü kabledecek taa bir partiya mramor Türkiya devletin Mustafakemalpaşa kasabasından. Neyä kullanacek mramor, üürendi bizim korrespondentımız Oleg Duloglo.
Kıpçak küüyündä birkaç soţial hem kultura obyektlerinä mramor plitaları koyulacek. Onnarı baaşış olarak primariyaya verdi Mustafakemalpaşa kasabası, haberledi primar Oleg Garizan.
OLEG GARİZAN, Kıpçak küüyünün primarı: «İsteeriz mramor döşemää Kultura Evin basamaklarına, sora primariyanın önündä basamaklarına,angıları çoktan lääzımdı düzülsün. Biz düzeriz parkı, orada var iki şelale, angılarını biz isteeriz türlü mramor renklerinnän düzmää, olsun orası bizdä gözäl. Hem da kullanacez onnarı primariyanın başka obyektlerinä».
Annaşmak, angısına görä Kıpçak küüyünä taa bir fura mramor baaşışlanacek, geçti yıl Kıpçak küüyün primarı hem sovet azaları Türkiya devletindä imzalandılar.
OLEG GARİZAN, Kıpçak küüyünün primarı: «Geçti yıl biz sovet azalarınnan Türkiya devletinä gittik, Mustafakemalpaşa kasabasına da gittik. Biz gittik başka mramor karyerlarına da, angıları başka vakıtlarda mramor plitalarını bizim küüyä baaşış olarak verdilär. Biz annaştık, ani bizim küü kabledecek taa bir partiya mramor».
Mramor plitaları Türkiya devletindän getirmää Kıpçak küüyünün primariyasına yardım etti Tika kurumu. 2016 yıldan Kıpçak küüyü kabletti Türkiya devletindän Mustafakemalpaşa kasabasından baaşış 6 fura mramor plitaları, angıların sayısı bütündän 130 ton. Onnar kullanıldılar Kıpçaan eni klisenin düzülmetisindä hem Afgan cengin veterannarın anmak taşını kaldırmaa deyni.
prevyu: Facebook/Primaria Copceac, UTA Găgăuzia
Источник grt.md 17.08.2022