Ayozlu Nikolay günündä Baurçuda yaşayannar kutladılar küüyün 210 yıldönümünü
Çiçek ayın 22-dä Baurçu küüyün yaşayannarı klisä kurbanını nışannadılar. Nicä diişildi küü insannarın bakışına görä, üürendi Oleg Duloglo.
Baurçu küü kuruldu 1812 yılda, Lunguţa derenin yakınnarında. Bu gözäl bir küü, neredä yaşayannar koruyȇrlar hem ilerlederlär kendi adetlerini.
Klisä kurbanını Baurçu küüyün yaşayannarı bakêrlar çiçek ayın 22-dä, Ayozlu Nikolayın günündä. Onnar nışannadılar, ani küü ii tarafa diişildi. Insannar, küü kuvetleri, hepsi barabar bunun için çalışȇrlar.
«Bizim küüdä çok gözäl yollar yapıldı, çok aaç dikildi, bütün klisedä düzmäk işleri oldu».
«Sevinmelik olsun gençlerä dä, uşaklar hepsi gitti. Ne işlemää, ne kazanmaa, hepsi kahırlanêr, bu iki yılda hepsi diişildi».
«Hepsini kutlêȇrım, hepsindä olsun saalık, ilerdä hepsi olsun islä».
«Kutlêȇrız bölä gözäl günnän, bizim küüyün kurbanı. Olsun uygunnuk dünnedä, annaşmak hem saalık, bu en paalı bu dünnedä».
«Bu gün çok büük bizä bir oruç, çok büük sevgili bir günümüz, bizm Ayozlu Nikolay bizim kurtarıcımız. Kutlêȇrız hepsini, kim burada var, kim geldi, hepsini» .
Erli kuvetlär çizgiledilär, ani onnar savaşêrlar işlemää, bakmadaan zorluklara, ki küüyü taa üüsek erä kaldırmaa, gözelletmää.
«Hepsinä dua ederim saalık, hepsi olsun ayakta, hep tä bölä toplanalım. Analım biri-birimizi , ani bu yortu küüyä deyni. Bizim küüdä var proektlär koymaa bruşatka, sora biraz para kalêr ilerletmää sokakları ötää dooru», — açıkladı Baurçu küüyünün primarı Nikolay Karapirä.
«Baurçu yaşayannarına büün adêrım uzun ömür, büük saalık. Ko Ayoz Nikolayın dualarınnan bizim aylelerimizin, bizim insannarın olsun saalıı, bizim insan yaşasın pak dünnedä, olsun pak gök, hepsinä uygunnuk, sevinmelik hem uzun yaşamak», — söledi Baurçu primarın yardımcısı Sergey Dimitrioglo.
«Şindi biz lääzım olalım birliktä, toplu, biri-birimizä yardım edelim, biri-birimizi sayalım. Ayozlu Nikolay bizi brakmayacek, bän inanêrım, olacek hepsi islä», — söledi Gagaziya Halk Topluşun deputatı Georgiy Kadın.
Baurçu klisesinin popazı Boba Pötr nışannadı, ani küü ileri dooru da lääzım ilerlesin, insannar uslulukta yaşasınnar.
«Büünkü gündä klisä bakêr Ayozlu Nikolayın gününü. İlerki vakıttan taa var klisedä adet yortulamaa ayozları. Onda vardı bir büük baaşış Allahtan, acıyannı. O verer bizä hepsimizä büük bir örnek, olsun bizdä dä acıyannık biri-birimizä, da nicä Allah sevdi onu, her olarsa bizdä dä acıyannık, bizi da Allah hep ölä sevecek, bizi da Allah brakmayacek», — söledi Boba Pötr.
Yortu günündä Baurçu küüyün yaşayannarını hem musaafirleri sevindirdilär türlü sport olaylarlan, konţert programasınnan hem halk oyunnarınnan.
Источник grt.md
