Kipçakta küçük yaşayannara Uşakları korumak günündä yaptılar türlü olayları
Uşakları Korumak gününä Kıpçak küüyündä kuruldu türlü şen programmalar. Uşaklar kablettilär unudulmaz emoţiyaları. Uşakların yortulu günündä bulundu bizim korrespondentımız Oleg Duloglo.
Uşakları korumak gününü beener hem bekleer herbir uşak, bu gün hepsi onnarın yanında, bütün sevgi onnara. Uşakların içi doluydu duygularlan, şenniklän, sevgiylän.
«Bän çok sevindim, ani çeketti bölä olay. Bän pek beendim oyunu, ani çatıynan döndürmää. Beenerim, ani hepsi kayıl oldu atlamaa, bän pek sevindim bu olaya».
«Bu gün hepsi lääzım korusun uşakları. Burada türlü olaylar geçer. Mamular lääzım büün hepsini bizä braksınnar, neçinki bu bizim günümüz. Bän pek beenerim kendi anamı hem bobamı».
«Pek şenim, pek beendim burada hepsini. Biz mamuylan, büün butün gün gezecez, dinnenecez».
Büüklär, angıları geldilär uşaklarnan yortuya, nışannadılar, ani lääzım danışmaa uşaklara sevgiynän, ki onnarın içi hep sevinmeliknän dolu olsun.
«Biz, büüklär, lääzım herbir gün açıklayalım uşaklara bizim sevgimizi. Yardım edelim onnara tanışmaa dünnaylän, aylerindä hepsi olsun islää, onnarın olsun kafadarları».
«Bugün isteerim hepsi uşaklar olsun şen, sevgili. Her bir uşak bu dünnedä lääzım bilsin, ani onu beenerlär».
«Büün büük bir gün, bizim uşaklarımızın günü. Biz çiktık kollektivnan, bizim analarnan, bobalarlan, bizim paalı uşaklarlan, hepsimiz çiktık büün stadiona şen yortuyu bilä geçirmää. Bizim uşaklarımız — o bizim yaşamamız. Onnar bizim en gözäl çiçeklerimiz, en paalı bu dünnedä bizä, onnar bizim geleceemiz. Hepsini teklif ederim bu yortuya, gelin da katılın».
Bu gün uşaklara deyni yapıldı şen yarışmaklar, konţert programması, kultura evindä onnar siirettilär çizgi filmleri, onara gösterdilär sınır poliţiyanın tehnikasını hem başka.
«Bizim büün şkolalar, yaslalar yaptılar bir kaç stanţiya, neredä uşaklar oynayaceklar. Büün var Kıpçakta uşaklara hem büüklerä hepsi. Büün bizdä hepsi uşak, büük ta olsa, küçük ta. Biz büün sımarladık uşaklara, ani aklına getirecez analara — bobalara, ani onnar da uşaktılar. Büün var hepsi küüdä, sade hepsindä olsun havez», — nışannadı Kıpçak küüyünün primarı Oleg Garizan.
İlk keret Uşakları Korumak gününü yortuladılar 1950 — yılda.
Источник grt.md 01.06.2022