Tomay küüdä geçti treneri Vladimir Taukçiyi anmak turniri
Tomay küüyüdä geçti serbest güreşi turniri deyni anmaa şannı treneri Vladimir Taukçiyi. Turnir geçti şansora 8 keret, o toplȇȇr Gagauziyanın hem Moldovanın en kaavi güreşçilerini. Vladimir Taukçiyi anmak turnirdä pay aldı 12 komanda 12 aarlık katigoriyasında.
Vladimir Taukçi – insan, angısı bütün yaşamasını sportlan baaladı, büük bir iz braktı kendi ana küüyünün istoriyasında. Gençlerdä o teerbi edärdi diil sade kaavi güreşçileri, ama haliz insannarı da. Güreşçilär Gagaziyanın hem Moldovanın türlü taraflarından her yıl büük havezlän pay alêrlar bu turnirda.
«Pek sevinerim pay almaa bölä turnirlarda, çünkü isteerim ensemää».
«Bän ilk keret pay alêrım böla turnirlarda, tarattım, ama bän hiç durgunmayacam, ileri dooru da pay almaa isteerim».
«Bu turnirda biz anêrız bizim serbest güreşi trenerı — Taukçi Vladimir Vasileviçi. Bu pek önemli, çünkü açan biz anêrız insannarı, onnar unudulmayacek hiç bir zaman».
Kurucular hem musaafirlär sayȇrlar, ani turnirın var büük önemlii. Bölä olaylar vererlär diil sade kolaylık güreşçilerä göstermää kendi bilgilerini güreş tarafından, ama taa da önemli unutmamaa saygılı insannarı, kim çalıştı kendi ana tarafı için.
«O bizim için paalı bir insandı, bizi üüredärdi diil sade güreşä, ama insan olmaa. O annadardı, ani güreş bizä yardım edecek. O bunu bizä sölärdi, annadardı. Biz dä, sanêrım, ani naşey sä savaşardık almaa. Bu noktaya geldik, ani biz dä şindi üürederiz, savaşêrız üüretmää uşakları, ani gelerlär ardımızdan», — söledi trener Dmitriy Babov.
«Gagauziyada var çok bölä turnirlar, angıları adalı şannı trenerlara, spotçulara, her bir küüdä var bölä turnirlar. Sayȇrım, ani bu pek önemli turnir, angısı yardım edecek trenerlara, güreşçilerä, taa bir adım ileri yapmaa», — söledi trener Pötr Kuru.
«Sayȇrım, ani bölä turnirları lääzım yapmaa her bir küüdä dayman. Biz anêrız bizim dostlarımızı, buluşêrız dostlarlan, kiminnän nezamansa güreştik hem siirederiz genç çoçukları, kim çekeder güreşmää, bizdä var çok islää güreşçilär», — açıkladı Taukçi Vladimirın kafadarı Konstantin Keleş.
Tomay küüyün primarı Födor Topçu nışannadı, ani Vladimir Taukçi — örnek hepsinä. O braktı büük bir iz, angısı hep kalacek Gagaziyanın istoriyasında.
«Her yıl biz onu savaşêrız yapmaa, ani adamın kalsın adı bu toprakta, o adamın kalsın işleri, ilerlesin onun çekettirmeleri. Neya üüretti güreşçileri, büün da yaşasın, ileriya dooru da yaşasın», — söledi primar.
Bütün vakıt ne işledi Vladimir Taukçi, o terbi etti diil bir evlad boyu güreşçi. Onun üürenicileri en ii taraftan göstererlär kendi küüyünü, Gagaziyayı hem Moldovayı nicä regional hep olä halklararası turnirlarda da.
Источник grt.md
