150-dän zeedä gencecik güreşçi gösterdi uurunu Gagauziyanın çempionatında
Serbest güreşi yarışmakları geçti Kıpçak küüyündä. Bu yarışmaklar yardım ederlär genç güreşçilerä hazırlanmaa Moldovanın serbest güreş çempionatına.
Gagauziyanın serbest güreşi çempionatında Kıpçak küüyündä pay aldılar 13 yaşınadan güreşçilär bütün avtonomiyadan. Yıl-yıldan taa çok uşak havezlän geler güreşä. Yarışmaklarda pay aldılar 150 güreşçidän zeedä, güreşlär geçtilär 13 aarlık kategoriyasında. Hepsi güreşçilär gösterdilär kendilerini üüsek uurda.
“Bizdä Gagauziyada 800 kişiya kadar çoçuk güreşlän zanaatlanêr, işleer 26 trener. Onuştan biz yapêrız çempionatı etaplara görä. Büün Kıpçak küüyündä, taa Kongazda yaptık, olacek Komrat kasabasında da”, — açıkladı Gagaziya sport bakannıın uzmanı Pötr Kuru.
Yarışmakların davacısı Mihail Molla çizgiledi, ani bu çepmionat yardım edecek bulmaa en kaavi, en talantlı güreşçileri. Onnar ötää dooru hazırlanaceklar Moldova uurunda yarışmaklara.
“Çempionatta yarışȇrlar 153 güreşçi bütün Gagauziyadın, 2009 duuma yılınadan. Biz böleriz yarışmaları da yapȇrız onnarı Gagauziya uurunda deyni belli etmää hem ayırmaa en kaavileri da hazırlamaa onnarı ötää dooru Moldova çempionatına”, — nışannadı çempionatın davacısı.
Genç güreşçilär saklamadılar, ani biraz sıkılardılar, ama bakmadaan buna, genä havezlän pay aldılar yarışmaklarda. Uşaklar seviner, ani onnarda var kolaylık güreşmää, güreştä kendi ii taraflarını göstermää.
“Çeketmedän bän biraz sıkıldıydım,ama ilk hem ikinçi güreştä üsteledim. Şindi üçünçü er için güreşeçäm, isteerim taramaa”.
“Geldim umutlan ilk eri almaa, ama olmadı. Bakmadaan bu işä, üçüncü er için dä pek sevinerim”.
“Umutlandım ilk eri almaa, ama ilk güreşi tarattım. Şindi üçünçü er için güreşecäm, sayêrım, ani var nicä üsteleyim”.
“Pek sevdim büünkü yarışmakları, medali, gramota verdilär bizä. Kıpçak küüyündä ilk keret pay alêrım bu yarışmaklarda”.
Çempionata geldidilär Gagauziyanın hem Moldovanın kaavi güreşçileri, onnar kendi nasaatınnan danıştılar uşaklara. Musaafirlär nışannadılar, ani çempionat geçti üüsek uurda.
“Dua ederim, ani olsun uşaklarda saalık, olsunnar şeremet, işlesinnär hem kaldırsınnar Gagauziyanın sportunu”, — söledi Moldova hem Evropa serbest güreşindä çempionatların ödülcüsü Nikolay Grahmez.
“Burda güreşerlar küçükuşaklar12-13 yaşında. Kim burada güreşecek islää, sora alaçez onnarı, hazırlanaçiklar Moldovaya”, — açıkladı sport liţeyin trenerı Födor Tukan.
Kıpçak sport şkolasının başı Ivan Trandafil seviner, ani Gagauziya serbest güreşi çempionatı Kıpçakta geçer.
“Pek sevineriz, ani kablederiz bizim güreşçilerimizi, musaafirleri bizim sport şkolamızda. Büün yarışmaklarda pay alêrlar 150 kişiya kadar, sayêrım, ani bu iş pek önemli”, — söledi Ivan Trandafil.
Hepsi güreşçilerä, kim aldı eri, verildi gramota, medali hem para baaşışları.
Источник grt.md
