Beşgöz küüyüdä geçti 16 – ci halklararası serbest güreşindä turnir
Beşgöz küüyüdä geçti 16 –ci halklararası turnir, angısını geçirerlär deyni anmaa treneri Pötr Tülüyü. Pötr Tülü giriştirdi güreşmeyı kendi duuma küüyündä. Onun çoyu terbiedilenneri tanıttılar Gagauziyayı halklararası arenada. Bu yıl turnir topladı 24 komanda Moldovanın üülenki dölaylarından, hem da 4 komanda Ukrainadan. Güreşleri gözletti korrespondetımız Zinaida Kanţır.
16 – ci halklararası turniri, adalı trenerın Pötr Tülünün anmasına, geçti Beşgöz küüyün kultura evindä. O topladı en islää güreşçileri devletin üülen tarafından, hep ölä pay aldılar genç olannar Ukraina devletindän da. Ofiţial açılışta çok islää laflar sölendilär adam için, angısı bakmadaan kendi kısa ömürünä, yaptı pek çok, ki güreşmäk nicä sport soyu, ilerlesin. Da buna örnek – pay alannarın sayısı, angıları geldilär göstermää ne onnar becererlär.
Nikolay Gotişan, Beşgioz küüyün primarı: «Her zaman lääzım tutasınız aklınızda o kişileri, angıları tarattılar.Hazırlayasınız kendinizi ensemäk için yarın. Unutmayınız hiç bunu».
İvan Tülü, Pötr Tülünün oolu: «Güreşmäk diil saade yarışmaklarda, güreşmäk — bütün yaşamak. Unutmayınız, ani siz bir büük güreşmäk aylesi».
Oyun pek meraklıydı. Vardı nasıl görmää sevinmäk yaşlarını, neçinki kimsey istemäärdı verilmää. Bakmadaan genç güreşçilerin yaşına, onnarın gözleri yalabıyardılar, hem da havez ensemää duyulardı. Uşaklar savaşardılar göstermää hepsini, neyä onnarı üüretti trenerlar. Onnarın laflarına görä bölä uurda turnirlar vererlär kolaylık diil saade göstermää kendini, ama dostlaşmaa da, hem da almaa eni becermekleri.
«Benim için yarışmaklar geçerlär pek islää. Bir sıra güreştim, da ensedim».
«Hepsi islääydi, ama biraz korku aldı beni, ani enseyameyecäm».
«Bişey kötü yok nasıl olsun deyecez, herlim tarayamaarsaydın – bu diil önemli, önemli o, ani sän saa olasın».
Yarışmalaradan uşakaları hazırlardılar oyuna hem da onnarı destekläärdilär trenerlar, angıları hodullanardılar taramaklarınnan hem da bulardılar lääzımnı lafları, açän onnar ensemäärdilär. Nicä sölendi, sportta ensämeer te o, kim hiç güreşmeer. Da her zaman var nasıl almaa revanşı karşı taraftan başka yarışlarda buluştuynan. Nicä nışannȇȇrlar trenerlar, bölä uurda yarışmaklar vererlär uşaklara kolaylık eni becermekleri almaa hem da taa yakın soperniini üürenmää.
Mihail Molla, Beşgioz küüyüdän treneri: «Geçirmää deyni büünkü turnirı yarımcı oldular Gagauziyanın gençlik hem sport bakannıı, primariya, nasaatçılar, çok dost, angıları benimnän barabar terbiyedildilär, güreştilär bizim küüyümüzdän. Onnar pek yardım ederlär kendi küülerinä».
Dmitriy Babov, Tomay küüyüdän trener: «Pek islä katılmaa bölä uurda turnirä, olma hepsinnän barabar, neredä sa gözletmää».
Yarışmalarda pay aldılar güreşçilär komuşu dolaylardan da hem da Ukrainadan, angıları nışannadılar, ani her yıl gelerlär, güreşmää hem da almaa ilk eri. Komuşu devletin trenerları çizgiledilär, ani bakmadaan zor vakıtlara, pay almak turnirda pek önemli.
Mihail Lupaşko, Leova kasabasından trener: «Turnir geçer – bu çok eder, bu pek islää, pek önemli. Çok saa olsunnar bölä yortu için bizim uşaklarımız».
Larisa Yaslava, Ukrainadan trenerın yardımcısı: «Pek islää geçer turnir, uşaklar evdän çıkȇrlar. Bölä güreşmeleri zor geçirmää. Uşaklar giderlär saade Odesa dolayına. Savaştık, geldik bu turnira. Çok şükür ederiz hepsini kabletmäk için hem bölä gözäl yarışmalar için».
Yarışmaların bitkisindä hepsi enseyicilerä verdilär diplomnarı, medalileri hem da para premiyalarını. Ama en önemli o, ani hepsi katılannar kablettillär islää duyguları, hem da kuvet bütün aftaya. Kabledilmiş bilgilär sa vereceklär kolaylık kullanmaa onnara taa üüsek uurda.
Источник grt.md 12.07.2022