Halk Topluşunda sesledilär GRT –nın işini gözledän sovetin iş çıkışlarını 2021 yılı için
Gagauzia Halk Topluşun VI oturuşunda deputatlar tanıştılar Gagauziya Radio Televizionun gözledici sovetin iş çıkışlarınnan 2021 – ci yılı için. Gözledici sovetin başı Mihail Vlah belli eti orada televizionun hem radionun baş daavalarını hem da problemalarını.
Studiyanın modernizaţiyası, ama maasuz geçmäk HD formatına — bunnar en önemli prioritetlar, angılarını belli etti kendi işindä GRT cümne kompaniyası, nışannadı Gözledici sovetin başı Mihail Vlah.
«Bilersiniz ani GRT hederlez ayinda geçti HD formatında yayınına, ama biz tehnika tarafından hep okadar kalȇrız eer diil 90-cı yıllarda, ozaman 2000-cilerdä. Büünkü tehnika durumun beterinä televizionnan yayınnanan görüntü pek düşük. Bundan başka taa bir büük problema – arhivın toplaması hep korunması”, — nışannadı Mihail Vlah.
Gözledici nasaatın öndercisi Mihail Vlah nişanandı, ani GRT-nın ilerlemesi için lääzım işlettirmää eni strategiyayı. Mihail Vlah çizgiledi, ani GRT-ya verilän bücet etmeer diil sade eni tehnika alınmasına hem başka problemaların çözülmesi için, ama şansora çalışannarın kazançlarını ödemää deyni. Ama bakmadan buna GRT-nın jurnalistleri başarȇrlar ilk davalarını – ilerlederlär gagauz dilini, nışanmnadı GHT deputatı Mihail Jelezoglo.
«Yılın içindä siz yaptınız 558 saatlık programaları gagauz dilindä. Eer başkan, Bakannık komiteti hem deputatlar makar ki 2 saat yılda lafetseydilär gagauzça, dilimiz ilerleyeceydi. Saa ol derim GRT-nın çalışannarına», — söledi Mihail Jelezoglo.
GHT başın yardımcısı Georgiy Leyçu nışanandı, ani diil çoktan GRT –nın radio yayınına açtı telefon sesleyici Gaydar küyüdän da heberledi, ani küüyüdä göstermeer Gagauz televizionu.
“Bän nicä annadım, bu problema baalı GRT-nın analog yayınından geçişi HD yayınına. Eer ölä saydı, biz lääzım kuralım koşulları ki insannar bakabilsinnär GRT-yi”, — söledi Georgiy Leyçu.
«GRT» CK gözledici sovetin öndercisi Mihail Vlah nışannadı, ani lääzım satın almaa maasuz tedarıı insannara, angısı baalaner televizora, ki onar GRT-yi görebilsinnär. Lääzım bulmaa para, da satın almaa bu tedarıkları fukarä insannar için, çizgiledi Mihail Vlah.
GHT deputatı Sergey Zahariya lafedip GRT CK iş çıkışlaır için nışannadı, ani lääzım işlettirmää kompaniyayı ilerlemäk strategiyasını.
Deputatların bir payı söledilär, ani onnarı teklif etmerlär pay almaa programalarda. Halk Topluşun başı DmitriyKonstantinov buna ölä cuvapetti:
«Teklif ederim hepsi deputatlara kendileri gitsinnär GRT-ya da katılsınnar programalara. Da açan birinizi almayaceklar, te ozaman lafedecez ki çözülsün bu soruş peydalanarsaydı», — söledi DmitriyKonstantinov.
Gagauziya Radio Televizionu cümnä kompaniyasının 2021 – ci yıl için iş çıkışları kabletmesi için seslerini verdilär hepsi deputatlar.
Источник grt.md 09.07.2022