«GRT» CK Gözledici Soveti kabletti kompaniyanın 2021 yılın çıkışlarını
Baba marta ayın 10- da geçti CK GRT gözledici nasaatın sıradakı oturuşu, angısında bakıldı iki soruş. Nasaatın azaları sesledilär kompaniyanın başını, angısı tanıttırdı radio hem televideniyanın işinnän geçän yılda. Hem hep ölä baktılar zaametçilerin danışmaklarını nasaata.
GRT kompaniyasının müdür işini bir vakıda götürän Galina Maryeseva nışannadı, ani 2021 yılın işi için çıkışlar erleşik kompaniyanın grt.md saytında, da herbir isteyenin var kolaylıı tanışmaa onnan.
Geçän yıl radionun hem televizionun jurnalıstleri gagauz dilinin ilerlemisi için kanonuna görä hazırladılar diil sade kendi programmalarını, ama eklendilär başka proektlerä ki genişletmää yayını. Bu uurda çevirildi çizgi filmları uşaklara deyni.
Gözledici Sovetin azaları birä-bir kablettilär kompaniyanın iş çıkışlarını geçän yıl için hem urguladılar, ani iş yapıldı üüsek uurda. Hep ölä çizgiledilär, ani birerdä lääzım ilerletmää işi tehnika tarafından ki gitmää ileri eni tehnologiyalarlan bir adımda.
TATYANA DONÇEVA, «GRT» CK Gözledici Sovetin başı: “Biz nasaatlarımızı hem fikirlerimizi açıkladık sizä, ani vakıt geçmää ţıfralı yayın formatına geldi. Bundan başka kompaniyaya läzım vermää investiţiyaları maasus tehnikanın alınmasına, ki geçmää eni tehnologiyalara, hem ilerletmää işi partnörlarlan, zenginnetmää yayınnarı gagauz dilindä, kurup eni programmaları. Geçän yıl yapıldı büük iş uşaklara deyni, filmları gagauz dilinä çevirdilär uzmannar”.
Oturuşun sırasında GN azaları aldılar kararı yoketmää Valkaneş için kameraman hem korespondent iş erlerini.
TATYANA DONÇEVA, «GRT» CK Gözledici Sovetin başı: “Büün bu iş erlerini yok ne için tutmaa, onnar kimisinä diil lääzım, açan kompaniyanın finans durumu diil ii. Da lääzım bulmaa rezerv kolaylıklarını, ki en lääzımnı işlerä harcamaa paraları. Bu iş için kablettik kararı onnarı yoketmää”.
Bu yıl kompaniyanın uzmannarı ilerledeceklär gagauz dilindä işini hem çalışaceklar eni programmalarını girirştirmää.
Источник grt.md 10.03.2022