GHT deputatları grupaların arasında ilişkilär için: “Gerilmeklär aralarımızda doal bir proţes”
Avtonomiya Halk Topluşunda pay etmeerlär eşil skaunnarı. Bunu Gagauziya Radio Televizionu “Obsujdaem vmeste” programasında söledilär Gagauziya Halk Topluşun deputatları. Deputatlar opoziţiyadan çetin durȇrlar neetindä geçirmää iki dolayda: Çok – Maydan küüyündä hem Valkaneş kasabasında 2 deputatın seçimnerini, angıları taa ileri geçindilär.
Gagauziya Halk Topluşun deputatları Leonid Kiosä hem da Aleksandr Dinjos haberledilär, ani avtonomiyanın kanondakı organında pay etmeerlär eşil skaunnarı, neçinki onnar şindän sora pay edili. Onnarın bakışlarına görä, lääzım işlemää Gagauziya insannarın islä yaşamakları için.
GHT deputatı Leonid Kiosä nışanandı, ani ilk lääzım bakılsın yaşayannarın problemaları, paaların politikası o üzerä, ani üüseldilär paalar şafka hem gaza.
LEONİD KİOSÄ, Gagauziya Halk Topluşun deputatı: «Biz diiliz kayıl deputlaranın çoyunun işlerinnän, angıları büünkü günnär Gagauziya Halk Topluşunda var. Orada becerikli deputatlar, ani diil ilk keret deputat oldular, da biz göreriz, ani onnar şindän sora yarmışar yıl kuvettä. Onnar durȇrlar GHT başında. Hepsi onnarın kararları kabledilerlär. Ama biz göreriz, ani bu işlämeer, insannar için bişey olmȇȇr, bakmadaan ona, ani bir sıra deputat kablederlär islää kazanç parayı, maşınaları, kabinetleri. Onnar en az ne lääzım yapsınnar, işlesinnär insan için».
Gagauziya Halk Topluşun deputatı Aleksandr Dinjos sayȇr, ani skaunnar için güreşmak Gagauziya Halk Topluşunda şindän sora çoktan bitti. Avtonomiyanın kanondakı bölümün öndercilerin ayırmasından sora bu konu kapandı.
ALEKSANDR DİNJOS, Gagauziya Halk Topluşun deputatı: «Te onnar korkȇrlar, ani onnarın erinä başkaları var nasıl otursunar – bu dooru iş. Bän korkmȇȇrım ondan, ani onnar istämeerlär iki dolayda Çok – Maydan küüyündä hem da Valkaneş kasabasında seçimneri geçirmää. Korkȇrlar, ani onnar olmayaceklar onnarın tarafında, da o zaman taradaceklar. Nesoy da olmasın, kimisi taradȇr, kimisi enseer. Şindiki zamannar onnar taa çok, biz taa azız».
Soruş, angısı baalı iki dolayda seçimnerin geçirilmesinnän, en pek dalgalandırȇr avtonomiyanıın kanondakı bölümün deputatlarını.
LEONİD KİOSÄ, Gagauziya Halk Topluşun deputatı: «Kimseydä yok havez bu erleri Gagaguziyanşın Halk Topluşunda kaplamaa. Biz isteeriz açıktan dooru seçimneri geçirmää, sansın korkȇrlar kaybetmää bu erleri, bu skaunnarı. Çoyu şindän sora sınaştılar. Onnarın erlerinä, o dolaylarda lääzım ayırmaa başka kişileri».
Gagauziya Halk Topluşun başın yardımcısı Aleksandr Tarnavskiy nışanandı, ani seçimnärlääzım geçirilsinnär, ama mutlaka lääzım hepsi proţeduralar bakılsın.
ALEKSANDR TARNAVSKİY, Gagauziya Halk Topluşun başın yardımcısı: «Da var bölä norma, ani iki ayın içindä, ondan sora nicä var erlär, geçirilmerlär seçimnär, ama koyulȇrlar. Koyulȇrlar iki aya kadar
erlim çaarılarsaydılar Gagauziyanın Bakannık kometitetindän. Lääzım seçimnär için para sızıntısı da belirlensin».
Gagauziyanın Halk Topluşun başın yardımcısı Aleksandr Tarnavskiy nışanandı, ani avtonomiyanın kanon organında her bir deputatta var kendi bakışı. O çizgiledi, ani politika uurunda güreşmäk er varsaydı da — bu doal bir proţes. Uzun krizistan sora Gagauziya Halk Topluşunda deputatların taa çöyu kapladılar türlü iş erlerini avtonomiyanın kanondakı bölümündä, öbür payı sa kaldı görevsiz.
ALEKSANDR TARNAVSKİY, Gagauziya Halk Topluşun başın yardımcısı: “Politika güreşmesindä opoziţiya hep isteer almaa öndercilii keni elinä, onnar sa kendi sıralarında isterlär kalmaa — bu norma sayılȇr. Biz kollegalarlan pek ayırılmȇrız. Halizdän, baş hem en önemli soruşlarda biz birtürlü duşuneriz. Biz birtürlü annȇrız vatandaşlık uurunda. Ani bizim devlet lääzım baamsız olsun. Biz hepsimiz birtürlü düşüneriz, ani Gagaguziyanın haklar statusunun kanonu lääzım konsituţiyaya yazılsın. Gagauziya uurunda biz birtürlü yaklaştık büdşet soruşuna. Hepsimiz seçtik, çevirildilär yaşamak erlerinä investiţıyalar, büük klaslarda üürenicileri dourmaa programası gene işler».
Gagauziya Halk Topluşun oturuşunda, angısı geçecek harman ayın 16 – da, bakılacek soruş iki dolayda: Çok – Maydan küüyündä hem da Valkaneş kasabasında seçimnerin geçirilmesi için.
“Obsujdaem vmeste” programasını bütün siiretmäk için BURAYA tıklayın.
Источник grt.md
