(Video) Deputatlar Gagauziyanın baş kanonuna diişilmekleri yapaceklar
Gagauziya Halk Topluşun deputatları hazırlȇȇrlar diişilmekeri Gagauziyanın baş kanonuna. Bunu için Halk Topluşunda kurulu maasuz komisiya. Onun başı ayırıldı deputat Georgiy Leyçu, yardımcısı oldu İvan Dimitroglo, sekretar Aleksandr Dülger.
Gagauziyanın Baş kanonu – Ulojenie 1998 yılda kabledildi. Ona lääzım yapılsın bir sıra diişilmeklär şindiki normalara görä, sayȇr Gagauziya Halk Topluşun deputatı Georgiy Leyçu. O çizgiledi, ani onnar olaceklar baalı Başkan seçimnerinnän. Reestrda yazılı, ani Gagauziyada seçicilerin sayısı kurȇr 132 bin kişi, ama halizdän yaşayannarın sayısı taa az, çizgiledi deputat. Bu üzerä seçimnerdä pay alȇr az insan.
«Çok insan bulunȇr aşırıda, avtonomiyada yaşamȇȇrlar. 50% seçici yok nicä olsun, bu insannar yok», — nışannadı Georgiy Leyçu.
Deputatlar seçicilerın sayısını aazaltmaa isteerlär. Bu sayı kuracek üçtä bir yaşayannarın bütün sayısından.
Taa bir diişilmäk olacek baalı GHT öndercilerin ayrılmasınnan. Erlim lääzımnı vakıtta deputatlar bunu yapamayceklar, ozaman lääzım olacek enidän Halk topluşuna seçimneri geçirmää. Bölä kararı kabledecek Başkan, nedän sora Merkez seçim komisiyası 3 ayın süresindä eni seçimneri geçirecek. Bu diişilmeklär lääzımnı, çünkü bu yıl deputatlar üç ayın süresindä ayıramadılar halk topluşun öndercilerini.
«Halk topluşu yoktu nicä işlesin. Başkan da yoktu nicä naşey sä bu durumda yapsın. Dokument, angısına görä vardı nicä bu problemayı çözmää, yoktu», — açıkladı deputat.
Diişilmeklär yapılacek o statyalara da, angılar avtonomiya statusunnan baalı.
«Gagauziyanın Özel statusu için kanonunda yazılı, ani Gagauziyada var hak baamsız olmaa erlim devletimiz kendi baamsızlıını kaybedärsä. Ama bu dokumenttä yok mehanizm, nicä avtonomiya kendi bu hakını kullanacek, erliim bu an gelärsä», — söledi Georgiy Leyçu.
Gagauziyanın Baş kanonunda var 10 bölüm. Kanon belli eder Gagauziyanın statusunu Moldova devletin içindä, kuvet götürücülerin hem yaşayannarın haklarını avtonomiya uurunda.
Diişilmekleri kabletmäk komisiyanın işinä katılaceklar ekspertlär, cümnä temsilcileri hem bilim uurunda uzmannar.
Preview foto: gagauzia.md
Источник grt.md
