2023 yılın Çiçek ayın (aprel) 30-da Gagauziya Başkanı seçimneri olacek – kandidatlar 8 var
Çiçek ayın (aprel) 30-da, Gagauziyada olacek Gagauziya Başkanı seçimneri. Bu seçimnerä, kandidat olarak, 8 kişi etişti: 7-si – adam kulluundan, 1-si dä – karı kulluundan.
Tiparlêêrız onnarın adlarını o sıraya görä, nicä Gagauziyanın Merkez seçim komisiyası onnara registrațiya yaptı:
1. Nikolay DUDOGLU (baamsız kandidat, Komrat kasabasından Gagauziya Halk Topluşun şindiki deputatı, Moldova demokrat partiyasının eski azası);
2. Grigoriy UZUN (Moldova soțialistlär partiyasının kandidatı, Valkaneş kasabasından Gagauziya Halk Topluşun eski deputatı);
3. Mihail FORMUZAL (baamsız kandidat, iki dönem Gagauziya başkanı oldu);
4. Viktor PETROV (Moldova soțialistlär partiyasının kandidatı, Komrat kasabasından Gagauziya Halk Topluşun şindiki deputatı);
5. Dimitriy KROYTOR (baamsız kandidat, 2002-ci yılda, gagauz halkına izmetini Şveyțariyada büükelçilik kreslosuna diiştirän Başkan);
6. Sergey ÇERNEV (baamsız kandidat, Valkaneş kasabasından Gagauziya Halk Topluşun eski deputatı);
7. Evgeniya GUȚUL (Moldova “Şor” partiyasından kandidat);
8. Sergey ÇİMPOEŞ (baamsız kandidat, Tomay küüyündän Gagauziya Halk Topluşun şindiki deputatı).
Not. Gagauziya Başkanı seçimneri olsun deyni pazara seçim sandıklarına lääzım çıksın seçimcilerdän 50% + 1 kişi. Herliim bu olmazsa, ozaman Gagauziya başkannıına bütün hazırlanma proțedurası enidän başlasın lääzım.
Herliim bu olarsa da ilk turda kandidatların birisi 50% + 1 oy kazanamazsa, ozaman iki aftadan sora 2-ci tur olacek, neredä kandidat olaceklar 1-ci turda en çok oy alan iki kişi.
Источник anasozu.com
