Halk Topluşunda teklif ettilär belli etmää iki dolayda seçimnerin gününü. Deputatlar teklifi tutturmadılar
Deputatların çoyu avtonomiyanın iki dolayinda — Valkaneşta hem Çok-Maydanda seçimnerin gününü belli etmää teklifi tutturmadılar. Da bakmadan ona, ani kommunist hem soţialist frakţiyasının deputatları çetin durardılar neetindä seçimnär gününü belli etmää, onnarın kollegaların çoyu nışannadılar, ani bu işi lääzım kanonnara uyarak yapmaa.
Valkaneştä hem Çok-Maydanda seçimneri geçirmää deyni Bakannık komiteti lääzım bulsun para, çizgiledi GHT başın yardımcısı Aleksandr Tarnavskiy.
«Siz, bezbelli, tutȇrsınız aklınızda, ani biz ayırı statyayı Seçimnär kodeksında tutturduk. Nışannadık, ani kanona görä Bakannık komiteti lääzım bu kanona kayılıını versin hem bulsun seçimnär için para kaynaanı. Bunu esaba alarak biz nesoy yapacez bu seşimneri? Еer seçimnerin gününü büün billi edärsidik, biz çeketterecez seçimneri hazırlamak işlerini”, — nışannadı Aleksandr Tarnavskiy.
Komunist-soţialist bloku frakţiyasının deputatı Pötr Fazlı teklif etti seçimneri bu güzün geçirmää.
«Bän sanȇrım, ani lääzım ceviz ayın 4-ndä seçimneri geçirmää. Bezbelli, ozamanadan para da bulunacek», — söledi Pötr Fazlı.
«Bizä lääzım ilkin seçimneri hazırlamak proţedurası çeketsin. Sora da hepsi olacek. Siz bölä mi sayersınız?» — danıştı deputatlara Halk Topluşun başı Dmitriy Konstantinov.
GHT deputatların başı Dmitriy Konstantinov tutturdu Aleksandr Tarnavskiyin iniţiativasını ki bütünnä seçim proţedurasını esaba almaa.
Butakım seçimnerin datası iki dolayda taa belli edilmedi.
Şindiki zaman GHT işleer 33 deputat. Onnarın iki kollegası Çok – Maydandan Födor Yanioglu hem Valkaneştän Dmitriy Topal geçindilär bu yıl Büük ayında.
Источник grt.md 08.06.2022