Gaydar küüyünün yaşayannarın evlerindä başladı akmaa kirli su. Ne buna söledi primar?
Gaydar küüyündä kimi yaşayannar aalaşerlar, ani su vermak sistemasından diil kötü su akȇr. Nasıl bu problemayı çözer küüyün kuvetleri, hem da ne söleer insannar bu probema için , üürendi Oleg Duloglo.
Gaydar küüyün kimi yaşayannarı söleerlar, ani onnara evä geler kirli su, onunnan yakışmêȇr yıkamaa, içmää da yok nicä. İnsannar annadêrlar, ani bu zoorladȇr onnarın yaşamasını. Kullanmaa ölä suyu yok nicä.
«Yıkêrız çamaşırları da hiç açılmêrlar, okadar kirli o su. Ne içäsin, ne bişey, insannara deyni o diil islää».
«Pek kirli su, pek kokêr, onu içer bizim uşaklar. Biz o suyu içeriz, bizim organizmada da ondan o hastalıklar. Nesaydı lääzım yapsınnar, nesaydı lääzım yapsınnar suynan bizdä».
«Mazut akêr. İkanırkana genä kokêr, pek kokêr».
Gaydar küüyün primarı İlya Kiosyä, annadêr, ani küüdä insannarın bir payı bölä problemaylan karşı gelerlär. Zorluk pak suynan halizdän var, söledi o.
«Büünkü gündä, bizdä var bir kuyu, o bulunêr küüyün yamacında , ondan akêr kara su, yaalı. Biz onnan yok ne yapalım, yok nicä düzelim, pek paalı çikêr koymaa filtraları. Yakışmêr durgudalım da , neçinki o yamaçta bulunêr, insannar da yamaçta yaşêr», — söledi primar.
İlya Kiosyä nışannêr, ani küüyün kuvetleri annȇȇrlar insanın kahırını. Büünkü gündä ne var niceydi yapmaa, onnarı yaptılar.
«Büvet yaptık bizdä, pak suyu vereriz insana. İnsan gelip alıp suyu, içer, parasız vereriz o suyu», — söledi primar.
Var ölä insannar da, angıları söleer, ani onnarda suynan zorluk yok.
«Açan öbür taraftan gelärdi su, kokardı, ama şindi aşırdan geler, kokmêr. Bana deyni islä,başkasına kokêr”.
“Bişey yok bizdä, bilmerim nicä başkasında, bizdä islä akêr”.
Bu yıl Gaydar küüyün kuvetleri koydular filtraları uşak başçasına, ki uşaklar kullansınnar hem içsinnär pak suyu.
Источник grt.md
