Dezgincä küüyüdä pakladılar hem ayazmaladılar pınarı
Su — yaşamanın sızıntısı. Eni sızıntının düzülmesi — büük olay insannara deyni. Geçän dinnenmäk günnerindä Dezgincä küüyüdä ayazmaladılar paklanılmış pınarı. Onu tertiplemää yardım etti iş adamı İvan Mardar.
Dezgincä küüyüdä, nicä da başka yaşamak erlerdä, ön daava — vermää insannara kaliteli suyu. Bakmadaan ona, ani küüdä var su sisteması, insannar kullanȇrlar suyu pınalardan da. Çoyu onnardan bulunȇrlar diil ii halda hem suyu yok nicä içmää. Regionun iş adamnarın biri alındı yardım etmää tertilemää Dezgincä küüyüdä bir pınarı. Bu üçüncü su sızıntısı, angısını o yaptırdı.
“Başkası da yapsın. Olsun pak pınarlar. Oldu pandemiya. Ko kendi filcanınan gelsin, içsin. Biz pakladık, hlorka koyduk. Olsun çok yıllara pak su”,- söledi pınarı paklamaa yardım etmiş iş adamı İvan Mardar.
Pınarı paklamak hem tertiplemäk işlerinä katıldılar İvan Mardarlän bilä küüyün primariyası hem küüyülülär, angıları yardım edärdilär işçilerä. Primarın hem GHT deputatın laflarına görä, bu ilk adım büük işin çeketmesindä. Plannarda ileri dooru tertiplemää başka pınarları da.
“Primariyalarda lääzım düzmää pınarları. Bizdä bulundu sponsor, angısı istedi yapmaa restavraţiyayı. Lääzım annamaa, ne brakıldı dädulardan. Lääzım korumaa, da kullansınnar insannar”, — söledi Dezgincä küüyünün primarı Vasiliy Kapsamun.
“Yardım bizä büük bu. Biz bunu koruyacez. Bu insannar da yanımızda olsunnar. Biz çekedelim bu işi, ki o olsun başarlı”, — söledi GHT deputatı Nikolay Raya.
Bu gün erli klisenin popazı ayazmaladı pınarı da nışannadı insannarın önemliini bölä ii işlerin yapmasında.
“İsteerim şükür edeyim insannarı, angıları yaptılar bunu. Bu Allahın baaşışı. Biz lääzım bu su sızıntısını koruyalım”, — nışannadı Boba Vasiliy.
Küüyün yaşayannarı şükür ederlär hepsini, kim pınarı pakladı hem tertipledi. Onnar inandırdılar, ani koruyaceklar bu pınarı hem kullanaceklar pak suyu.
“Ne oturmaa yoktu neredä, ne su içmää. Şükür ederim”.
“Çok gözäl, ani yaptılar, var düümä, ilin su almaa”.
“Şükür ederiz bu insannarı, pek mıkayet”.
“Bu insannara Allah saalık versin çok yıllara. Pek mıkayet insannar”.
Pınarı tertipledilär da yaptılar ölä, ki suyu kolay olsun almaa diil sade uşaklara, ama büük yaşta insannara da. Çünkü çıkırı yok, koyuldu nasos, da kazanı doldurmaa deyni lääzım sade düümeyä basmaa. Da nicä söledilär insannar, sıcak havada burada var nicä olacek içmää serin su hem gölgedä beklemää avtobusu.
Источник grt.md
