Kongaz küüyünün yaşayannarı ikincilää geçirdilär mitingı paaların büümesinä karşı
Büün paalar gaza hem odunnara devletin yaşayannarına deyni kalȇr baş problema, neçinki pensiyalar hem kazanç paraları etişmeer onnarı ödemää. Onun için insannar toplanȇrlar mitinglara da yalvarȇrlar kuvetleri yardım etsinnär çıkmaa bu durumdan. Ölä geçän pazar günü, harman ayın 7- dä, Kongaz küüyün yaşayannarı ikincilää toplandılar kultura evindä hem baktılar nesoy var nicä çıkmaa bu durumdan. Oluşun hazırlayıcıları oldu primariya hem cümnä aktivisti İvan Bessarab.
Bu yıl pek aktual söleiş “Hazırla kızaa yazdan — taligayı da kışın”. Çünkü bu yıl paalar gaza pek büüdülär. Çoyu insannar yazdan başladılar hazırlamaa odun, tezek hem kömür, ama onnar da paalı. Maasuz bu problemayı kaldırdılar mitingta. Kongaz küüyünün primarı söledi, ani lääzım birleşmää dä savaşmaa çözmää bu problemaları.
MİHAİL ESİR, Kongaz küüyün primarı: “Gaz bizdä olacek, ama onun paası ölä, ani biz onu kullanamayacez, bakacez trubaya, ama yakacez tezeklän. Ama çoyunda o yok. Kömürün bir tonu tutȇr 10 bin ley, ama onu almayacek kimin kazanç parası pek küçük. Bölä insan bizdä çok”.
Mitingta tutturdu yaşayannarı küüyün deputatı GHT Svetlana Dimitroglo. O urguladı, ani insannar lääzım çıksınnar mitinglara, da devlet işitsit onnarın sesini, hem ani okulları diil läzım geçirmää onlayn rejımına, zerä uşaklar bişey üürenmeyeceklär. Analara da zor olacek, maasuz küüdä, kimin var iki-üç uşaa.
SVETLANA DÜVENJI, GHT deputatı: “Lääzım istemää hükümettän kaldırsınar kazanç paramızı, kompensaţiyaları, hem bän, nicä üüredici, angısı işleer okulda, nışannȇȇrım, ani lääzım yapmaa hepsini, ki bizim bücet kurumnarımız işlesinnär. Büündän söleerlär onun için, ani okullar geçeceklär onlayn rejımına. Bunu beklärdik. Biz sizinnän küü yaşayannarı, onnar kasabadan bizi annamayaceklar. Ama o aylelerdä, neredä iki-üç uşak, kimdä sä hiç yok. Onnar bilmeerlär , ne bu, açan ayledä üç uşak, da herbirinä lääzım ayırı içer, zerä birindä matematika, öbürürndä himiya hem başka”.
Küü primariyanın nasaatçısı Gennadiy Tulba urguladı, ani sıradakı mitinglarda insannarın sayısı zeedelener, çünkü herbirinä ilişer bu soruşlar. Da lääzım onnarı kaldıralım.
GENNADİY TULBA, Kongaz primariyanın Nasaatçısı: “Var rezolüţiya, biz lääzım hepsimiz onu imzalaylım. Bän nasaat ederim onu brakmaa primariyada, da hepsi Kongaz küüyün yaşayannarı, kim geleceklär orayı imzalasınnar. Bizä lääzım en az 10-15 bin imza, ki yollamaa bu dokumentları Rusiyaya”.
Küüyün yaşayannarı söleerlär , ani pay alȇrlar mitinglarda , ki onnarı kuvetlär işitsinnär, çünkü paalar gaza, imäk mallarına hem başka işlerä pek üüsek da pensiyalar , kazanç paralar etişmeerlär, finaslar giderlär sade ödemää koşulları. Çoyu aylelerdä kimsä gider aşırıya kazanmaa, zerä bu durumda zor yaşamaa, söleer insannar.
Küüyün yaşayannarı tutturdular iniţiativayı gelän dinnenmäk günnerindä hem avgustun 19da enidän toplanmaa , taa onnarı işitmeyincäkuvetlär. Ama şindi cümnä aktivistleri teklif ettilär erli kuvetleri versinnär insannara transport ki onar pay alsınnar mitingta, angısı geçecek harman ayın 12- dä GHT yapısının önündä. Mitingın sonunda hepsi pay alannar koydular imzalarını rezolüţiyanın altında.
prevyu: gagauzinfo.md
Источник grt.md
