Gagauziyanın başkanı kutladı sportçuları eni enseyişlärlän halklararası uurunda
Çiçek ayın 5 dä Gagauziyanın başkanı kutladı gagauz sportçularını hem onnarın trenerlarını üüsek çıkışları için sport uurunda. Nikolay Grahmez baba marta ayında iki keret oldu Evropa serbest güreşmesindä çempionatın bronza ödülcüsü. Aleksandr Romanov — Evropa çempionu grepplingta.
Gagauziyanın Başkanı İrina Vlah sıradakı keret şükür etti Evropa greppling çempionatın taraycısını Aleksandr Romanovu hem ikili bronza ödülcüsünü Evropa uurunda Nikolay Grahmezı üüsek becermeklär için hem baaşladı onnara diplomnarı. Regionun başı urguladı, ani sportçular üüsek uurda tanıttırdılar devleti, pay alıp Evropa çempionatlarında.
“Taramak- bu komandalık iş. Siz annȇrsınız te o insannarın paasını, kim sizä yardım eder sport karyeranızın her bir adımında, da siz annȇrsınız halızdän, neyä biz da lääzım sizdän üürenelim, ani sport bu iş, dooru iş. Sportta yok yalan, şalvirlik, da ii çıkışları hızlı kazanmayacan. Lääzım bu iş için çok işlemää”, — nışannadı başkan.
İrina Vlah teklif etti sportçuları herzaman olmaa örnek gençlerä.
“Sizi tutturȇr bütün Avtonomiya, devlet. Sizi çok insan devlet aşırı tutturȇr. Siz üürendiniz kurmaa komandayı, etişmää koyulmuş neetlerä. Bu sizin işiniz, hem te o insannarın, angıları sizin yanınızda, angıları inanȇrlar sizä hem tutturȇrlar sizi. Siz bilersiniz diişmää, işlemää gösterip harakterinizi”, — söledi İrina Vlah.
Nışannayacez, ani Aleksandr Romanov bu yıl baba marta ayında oldu grepplingta Evropa çempionu. Yarışmaklar geçtilär Ungariyada Budapeşt kasabasında. Finalda Aleksandr Romanov taradı konkurentını Poloniyadan da oldu çempion 130 kilalık kategoriysında.
Nikolay Grahmez hep martta kazandı iki bronz ödülünü Evropa çempionatında sebest güreşmesindä gençlerin hem büüklerin aralarında 70 kilalık kategoriyada. Güreşmektä ödül için taradı sportçuyu Türkiyadan.
Foto — prevyu: Gagauzia başkanın facebook sayfasından
Источник grt.md
