Gagauziyadan şannı trener Pötr Kuru oldu Evropa çempionu dzüdo uurunda
Kirez (iyün) ayın ikisindän Greţıyada Krit adasında İraklion kasabasında geçer Evropa çempionatı dzüdo uurunda veterannarın aralarında. Yarışmaklarda pay aldı Moldova toplumunnan gagauz sportçusu, şannı trener Pötr Kuru, angısı kazandı Evropa çempionu titulunu.
Gagauziyanın hem Moldovanın şannı trenerı dzüdo hem sambo uurunda Pötr Kuru pay aldı 100 kilalık kategoriyada. O geçirdi üç güreş, angılarını taradı. Üçüncü güreşi ilk er için ipon çalımınnan taradı konkurentını Almaniyadan. Karşıtlan taa ileri buluşmadı, onun için koydu bütün kuvedini, da kazandı çempion titulunu. Yarışmaklarda pay aldılar sportçular 36 devlettän.
“Yarışmaklar geçtilär üüsek uurda, hepsi çempionnar güreştilär , geçirip üçär-dördär güreş, taradılar kendi konkurentlarını, da kazandılar ilk erleri. Onnarın arasında sizin “çıraanız” da Pötr Kuru var”, — annattı çempion.
Pötr Kuru çok yıl zanaatlanȇr trener uurunnan, hem aktiv götürer sport yaşamasını. Şindän sora var Evropa hem dünnä çempion titulu hem kazandı 8 ödül. Sıradakı ödülü, Pötr Kurunun laflarına görä, o beklärdi, neçinki her gün geçirdi sınışları.
“Evropada oldum üç keret ikinci, bir keret üçüncü, bu sefer da ilk. Bu enseyiş pek çok sınışların çıkışı. Biz işledik deyni diil gelmää da geçmää matın kenarından. Biz gösterdik, ani var nicä tarayalım türlü uurda yarışmaklarda. Bu beklenän taramaktı. Çok ter sıra geldi dökmää”, — söledi Pötr Kuru.
Dün Moldovanın toplumu kazandı dört altın Evropa çempionatında. Büün hem sabaa taa dört sportçu güreşecek, da savaşaceklar kazanmaa sıradakı ödülleri. Nicä nışannadı Pötr Kuru, Moldovanın toplu takımı ii kendini gösterer bu yarışmaklarda. Bütündän dä devletimizdä dzüdo ilerleer.
Haberin fotosu Pötr Kurunun facebook sayfasından
Источник grt.md
