Evropa Çempionunu grepplingta Aleksandr Romanovu evdä şannı karşıladılar
Evropa çempionunu grepplingta Aleksandr Romanovu kutladılar altın ödülün kazanmasınnan onun dostları, yakındakları hem sport üüretim kurumnarın üürenicileri. Onnar karşıladılar onu bayraklarlan hem en sıcak laflarlan. Yarışmaklar geçtilär Vengriyada.
Evropa çempionu grepplingta Aleksandr Romanov pay aldı yarışmaklarda Moldovanın toplu takımında, angısına girdi dört sportçu.
Geçän yıl Aleksandr bu çempionatta kazandı üçüncü eri, bu yıl sa o aldı çempion titulunu. Bu enseyiş için o koydu bütün kuvedini da taradı dört buluşmakta kendi konkurentlarını, angılarınnan taa ileri vardı buluştuu martta, da bilärdi onnarın yufka erlerini.
Karşıladılar Romanovu nicä çempionu bayraklarlan hem çiçeklärlän. Nicä söledi sportçu, taramak verildi diil kolay.
“Finalda güreştim geçän yılın Evropa çempionatın triumfatorunnan Poloniyadan Pivovarskiylän . O pek anılmış greppling dünnesindä hem pek kaavi konkurent . Biz onnan hep karşı geldik 2019 yılda bronza ödülü için güreşmektä. Ozaman bän onu taradım sayılan 7-4, ama bu sefer finalda onu taradım sayılan 6-0. Bän kullandım maasus priyömu, da hızlı onu taradım”, — annattı çempion.
Aleksandr Romanovun güreşmesini siirettilär genç olannar. Uşakların laflarına görä, onnar hodullanȇrlar, ani bizdä Gagauziyada var kimdän örnek almaa. Onnar hodullanȇrlar, ani devlet hem regionun bayraa kaldırılȇr halklararası arenada.
“Toplandı çocuklar, komanda, da çıktık tutturmaa. Bän halızdän hodullanȇrım çocuklarlan, ani burada toplandı bukadar kişi”.
“Kultamaa geldik bizim trenerı, onun taraması için Evropa çempionatında. Savaşacez nicä o, pay almaa bölä yarışmaklarda hem hodullanȇrız, ani o bizim trener”.
“Biz hodullanȇrız Aleksandr Romanovlan, ani o oldu Evropa çempionu. Siirettik, tutturduk onu taramakları için”.
Ȇkranın öbür tarafında siiretti hem düşündü Aleksandr için onun yakınnarı. Onnar hodulanȇrlar olanın pay almasınnan bölä üüsek yarışmaklarda. Sportçunun bobası Anatoliy Romanov nışannadı, ani çocuklar ikisi dä taa küçüktän onnan bilä zalda sınış edärdilär.
“Verdim onnara güreşmäk becermeklerini, zerä kendim bu sportlan zanaatlanȇrım. Benim iki oolum da güreştilär küçüktän. Sorarsaydınız onnara, nezaman geldilär zala, sölämeyeceklär. Onnar büüdülär bu sportta”, — annattı Anatoliy Romanov.
Karşıladılar Evropa tarayıcısını diil sade gençlär, ama cümnä aktivistleri dä, angıları sayȇrlar, ani üüsek becermeklär için devlet lääzım yardım etsin sportçulara, bakmadaan angı sport uurunda taramaklar.
Aleksandr çeketti kendi yolunu sportta serbest güreşmesindän. Büün yok güreş çeşiti, angısında o pay almadı. Soruşa, angısını taa deneyceydi — paraşut sportunu cuvabını verdi. İlk kendi taramasını tutmȇȇr aklında, ama taratmayı tutȇr, çünkü o pek büük acıydı.
“2010 yılda Evropa çempionatında gençlerin aralarında benim dostumnam Ukrainadan üçüncü er için güreştim. Da ozaman ilk eri davacılar verdilär ona, bilärkänä, ani ödül benim cöbümdä. Aldılar. Da bu beni psihika uurundan kırdı. Geldim evä, da istärdim brakmaa. Ama gittim ileri”, — getirer aklına çempion Aleksandr Romanov.
Bir-iki gündän sora sportçu uçȇr Amerikaya, neredä pay alacek sıradakı UFS urunda güreşmedä. O geçecek çiçek ayın 23 — dä. Geçmiş güreşmeklär olmadı, zerä Aleksandr yaralandıydı.
Источник grt.md
