(Video) Gagauz güreşçi Nikolay Grahmez kazandı taa bir bronza ödülünü Evropa çempionatında
Baba marta ayın 28-dä Vengriyada Budapeşt kasabasında başladı Evropa çempionatı sebest güreşmesindä büüklerin aralarında. Onda pay aldı Moldovanın toplumu. Gagauziyayı tanıttırdı iki sportçu Nikolay Grahmez hem Georgiy Rubaev. Regionun anılmış serbest güreşçisi Nikolay Grahmez genä kazandı bronza ödülünü.
Evropa çempionatında sebest güreşmesindä gagauz sportçusu Nikolay Grahmez pay aldı 70 kilalık kategoriyasında Moldova toplumun içindä.
Finalın 1/8 payında Nikolay Grahmez buluştu güreşçiylän Albaniyadan hem taradı sayıylan 11-1.
Çıkıp serbest güreşmesinin çempionatın finalın dördüncü payına Gagauziyanın spotçusu güreşti Polşadan konkurentlan hem ensedi sayılan 14-9.
Güreşmektä finala çıkmaa deyni, Nikolay güreşti pek kaavi hem becerikli güreşçiylän Armeniyadan Arman Adreasännan, angısına tarattı sayılan 2-6.
Bronza ödülü için Kongazlı gagauz güreşçisi karşı karşıya geldi spotçuylan Türkiyedän Selahitin Kılıçsalayannan hem taradı onu sayılan 11-4, kazanıp üçüncü eri.
İkinci sportçumuz Gagauziyadan Georgiy Rubaev güreşmektä 92 kilalık kategoriyasında bronz ödülü için tarattı Gruziyadan konkurentına sayılan 2-7 da oldı beşinci.
Evropa çempionatı serbest güreşmesindä geçer Budapeşt kasabasında baba marta ayın 28 – dän çiçek ayın 3 -nädän. Yarışmaklarda pay alȇr 400 sportçu dünnenin 37 devletindän . .
Diil çoktan Nikolay Grahmez kazandı bronz ödülünü hep ölä Evropa çempionatında, ama gençlerin aralarında 23 yaşınadan. O geçtiydi Bulgariyanın Plovdiv kasabasında.
Источник grt.md 01.04.2022