Nikolay Grahmez kazandı Evropanın bronza ödülünü
Baba marta ayın çeketmesindä Bulgariyanın Plovdiv kasabasında geçti Ervopa çempionatı üç olimpik güreş soylarında: sebest, grek-rim hem kızların aralarında. Bu yarışmaklarda pay aldı Moldovanın toplumu da. Güreşçilerimiz kazandılar altın, gümüş hem bronza ödüllerini. Topluma girdilär Gagauziyanın iki sportçusu. Nikolay Grahmez oldu Evropanın bronza ödülcüsü. Onu kutladılar sport liţeyindä, neredä Nikolay üürendi hem hazırlandı yarışmaklara.
Çempionattan döndüynän, Nikolay Grahmezı yortulu karşıladılar Komrat sport liţeyindä. O başardı bu üürenmäk kurumunu da oldu örnek gelecek çempionnarına, erlem ii ürenärsäydilär hem çok hazırlanarsaydılar, sade ozaman var nicä kalkmaa şannı pyedestala.
Kendi sport yolunu Nikolay çeketti Kongaz küüyün sport zalında, soram ilierletti üürenmeyi sport liţeyindä.
Sıradakı kendi ödülü için annadȇrlar hodulluklan, makar istärdi taramaa altını. O geçirdi iki güreşi, angılarında maasuz tehnikaylan taradı kendi konkurentlarını. Finala çıkmaa deyni tarattı sportçuya Gruziyadan, ama dördüncü buluşmakta üçüncü er için kaavi güreşmektä taradı konkurentını Avstriyadan sayılan 10-0, da oldu Evropanın ödülcüsü.
NİKOLAY GRAHMEZ, Evropa çempionatın serbest güreşmesindä bronza ödülcüsü: “Bän hodulluyum kendi çıkışımnan. Halizdän gidärdim yarışmaklara altın ödül için, ama biraz uymadı, bän bunda durgunmayacam. Umutlanȇrım, ani taa sevindirecäm hepsini, duuma erimi, onnarı, kim beni tutturȇr, Gagauziyayı hem devleti”.
Gözletti hem tutturdu bizim sportçularımızı güreştä onnarın trenerı İlya Esir. O nışannadı, ani Nikolay güreşti üüsek uurda da gösterdi, ani sıkı sınışlar vererlär kendi çıkışlarını. Trener hodullanȇr, ani onun işi boşuna gitmedi.
İLYA ESİR, Komrat sport liţeyin trenerı: “Bütündän yarışmaklardan bän memnunum, var ödül, vardı çok pay alan, angıları çempion oldular, da herbiri isteer taramaa. Onun için onu [Nikolayı – red.] şükür ederim, ani topladı kendini. Zerä olȇr ölä, açan sportçu kimäsä taradȇr, brakȇr kendini, da sora zor toplanmaa sıradakı güreşä. Ama o üçüncü er için topladı kuvedini da gösterdi, ani bu aarlık kategoriyasında o var nicä kazasın diil sade üçüncü eri, ama ilk olsun”.
İkinci sportçu Grigoriy Karastoyan çıkamadı finala, çünkü taa ilerdän yaralıydı, da hazırlanamadı bütündän, ama hep okadar ii güreşti, söledi çocukların trenerı.
İLYA ESİR, Komrat sport liţeyin trenerı: “Güreşmektä tarȇr her keret o, kim en pek sever güreşmeyi. Onun konkurentı bezbelli pek sever güreşi. Ona lääzım iki kat taa çok hazırlanmaa. Da onda olacek ii çılışlar”.
Bütündän Moldovanın toplumu güreşti üüsek uurda hepsi üç güreş soyunda. Ödülleri kazandılar diil sade çocuklar, ama kızlar da. Nikolay Grahmez nışannadı, ani yıl-yıldan devletin sportçuları taa ii güreşerlär.
Источник grt.md 15.03.2022