Komrattan genç güreşçilär Moldova çempionatından evä ödüllärlän döndülär
Komrat sport liţeyindä ödülleri kazanmış Moldova serbest güreşi çempionatında sportçuları şannı kutladılar trenerlar hem terbiedilennär.
Komrat sport liţeyindä oldu adet geçirmää yortulu oluşları çocuklar hem onnarın trenerları için, angılalrı kazandılar çempion titulunu yada II, III erleri devlet hem halklaraası yarışmaklarında.
Geçän dinnenmäk günneri iidilär bizim güreşçilerä deyni. Devlet yarışmaklarından onnar getirdilär ilk, ikinci hem üçüncü erleri. Nicä urguladılar trenerlar İlya Esir hem Födor Tukan, komanda üüsek uurda tanıttırdı üürenmäk kurumunu.
Bitki iki yılın içindä pandemiyanın vakıdında çocukların yoktu kolaylıkları çıkmaa yarışmaklara. Devletin çempionatı verdi kolaylık göstermää kendini, ne üürendilär bu vakıdın içindä. Tarayıcıların laflarına görä, güreşlär geçtilär kızgın hem kaavi. Birazı karşı karşıya geldilär dostlarınnan hem komandadan güreşçilerinnän. Nicä söledilär çocuklar, “mat dışı biz dostuz, ama matta konkuren olȇrız”.
“Güreştim ilk er için Seröja Kılçiklan, da tarattım ona. Finala çıkmaa deyni güreş kaaviydi. Taradım konkurentımı sayıylan 6:2. Etmedi tehnikam hem karakter”, — söledi ödül kazanannarın biri.
Yarışmaklarda pay aldı sport liţeyın taa bir sportçusu İrina Vlah, angısı güreşti konkurentlarlan, angıları taa büük ondan, da kazandı ikinci eri. Plannarda gelän yıla taramaa çempion titulunu.
“Benim aarlık kategoriyamda iki kız vardı, pay aldım ii uurda. Taradım ilk güreşi, tarattım ikinciyi. Bizim komanda ii pay aldı yarışmaklarda. Bän savaşacam taa sıkı hazırlanmaa da gelän yıla taramaa”, — söledi İrina Vlah.
Sıradakı çempionat verdi kolaylık sportçulara göstermää kendilerini hem görmää kendi beceriklik uurunu, hem neya taa lääzım işlemää.
Sport liţeyın başı Harlampiy Hor şükür etti trenerları hem uşakları, ani onnar koydular kuvetlerini da gösterdilär üüsek çıkışları devlet uurunda.
“İsteerim sölemää , ani çocuklar sıradakı keret bizi sevindirdilär bu yıl da. Bizdä var ödül erleri. İsteerim şükür etmää terbiedilenneri İlya Esirı hem Födor Tukanı onnarın işi için”, — söledi Harlampiy Hor.
Devlet çempionatında serbest güreşmektä Sergey Kılçık kazandı ilk eri, da kabletti hakı tanıttırmaa Moldovayı Eropa yarışmaklarında, angıları geçeceklär Buharest kasabasında kirez ayında.
Источник grt.md
