Video: Gagauziyanın sambo güreşçileri getirdilär gümüş ödülü Dünnä çempionatından
Dünnä çempionatı sambo güreşindä geçti Greţiyada Saloniki kasabasında. Yarışmaklarda pay aldılar Komrat dolayın sport okulundan göreşçilär: Aleksandr Nedu kazandı gümüş ödülünü, Darya Vlah hem Daniil Zahariya kalkınamadılar şannı pyedestalın basamaana, ama gösterdilär kaavi güreşi.
Dünnä çempionatında 71 kilalık güreşçi Aleksandr Nedu geçirdi üç güreş da taradı karşındakı sportsmenneri Bulgariyadan, Serbiyadan hem İzraildän da çıktı finala. Güreş Rusiyanın sportçusunnan kızgındı hem görümnü. Kaavi güreştä ikisi dä sambistlär kablettilär bir türlü puan, ama davacıların kararınnan taramayı verdilär rusiyadakı sportçuya. Bizim Aleksandr Nedu oldu Dünnä yarışmakların gümüş prizöru.
Geçän yıl Dünnä yarışmaklarında Aleksandr kazandı üçüncü eri. Trenerlär umutlanȇrlar, ani onnarın trebiedilenneri gelän yıla alacȇklar altını Dünnänın en üüsek yarışmaklarında. Ternerlerin laflarına görä Gagauziyanın sportçuları gösterdilär kendi harakterini, da koyup bütün kuvedini taradılar kaavi konkurentlarını.
Sambist Daniil Zahariya kendi 79 kilalık kategoriyasında güreşmedä üçüncü er için tarattı kendi konkurentına Ukrainadan. Hep ölä bronza ödül için dünnä yarışmaklarında Darya Vlah tarattı iki keret Düünä çempionuna Ukraina devletindän. Bu yaş kategoriyada o en küçüktü hem onun ilk bölä uurda yarışmakları.
Nicä söledi trener, onnara etişmedi kuvet hem konkurentlar da pek kaaviydilär. Bütündän Moldovanın komandası bu yarışmaklardan getirdi sadece iki ödül gümüş hem bronza.
Paraylan pay almaa yarışmaklarda yardım ettılär Komrat dolayın sport okulu barabar Gagauziyanın gençlık hem sport bakanıınnan. Terbiedicilär hodullanȇrlar kendi uşaklarınnan.
Yakında sportçular hazırlanacȇklar taa iki önemli yarışmaklara Dünnä çempionatına büüklerin aralarına, angısı geçecek Uzbekistanda kasım ayında, hem Evropa yarışmaklarına kadetların aralarında, angıları Kıbrısta geçeceklär. Komrattan sportçular pay alacȇklar yarışmaklarda Moldovanın toplu komandasınnan.
Источник grt.md 20.10.2021