Gagauziyanın sportçuları başarları için 2021 yılda ödüllendilär
Sportçuları ödüllemäk şannı toplantısı Başküüdä geçti. 2021 yılın başarları için Evropa, dünnä, hem devlet çempionatların tarayıcılarına diplomalar hem para verildi.
Geçän 2021 yıl pek zengindi ödüllerä, angılarını kazandılar bizim sportçularımız türlü sport uurlarında. Diil bir keret bizim serbest güreşcilerimiz, sambistlär, aar atletikacılar, şaşki oyuncäları, boksörlar kaldırdılar devletin bayraanı halklararası arenalarda.
Bizim çempionumuz boks uurunda İlie Argatu, halklararası çempionatında şaşki çempionu Eva İrigina, Nikolay Grahmez serbest güreşmesindä çok keret Evropa hem devlet prizöru oldu, Darya Vlah sambo uurunda çempion, Födor Kazanjı tatayıcı muay-tay düüşündä. Üüsek çıkışlar aar atletikada da var.
Gagauziyanın Başkanı İrina Vlah ödülledi diplomalarlan hem premiyalarlan Evropa hem dünnä yarışmaklarında tarayıcıları. O urguladı, ani taramaklar kabledilmeerlär bir gündä, ama onnara deyni hazırlanmak gider aylarlan.
Üüsek uurda voleybol, basketbol, futbol devlet yarışmaklarında kendilerini gösterdilär türlü komandalar. Gençlik hem sport bakanıın başı Sergey Staoyanoglo nışannadı diil sade sportçuların becermeklerini, ama trenerları da.
Sportçuların ödüllenmesi adet oldu, neçin ki çoyu onnardan diil ilk keret kablederlär diplomnarı. Kimä sä geçän yıl pek iidi, kimä sa zordu. Kim sa istärdi kazanmaa altın ödülü, kimä sä gümüş ilk ödüldü.
Birdän taramak olmayaceydı, erlem sportçular koymasaydılar kuvedini hem yapmasaydılar hergünkü sınışları. Bu iş için lääzım profesional uzmannar. Trenerlar koyȇrlar bütün kuvedini hem canını ki terbi etmää esaplı uşakları hem becerikli sportçuları.
Bakmadaan ona, ani 2022 yıl sade başlȇȇr, Gagauziyanın sportçularında var üüsek ödüllär boks, serbest güreşmesindä, hem muay-tay Evropa hem devlet çempionatlarından .
Nışannayacez , ani ödüllenmektän sora bizim iki sportçumuz Nukolay Grahmez hem Aleksandr Romanov gittilär serbest güreşmesindä hem greppling Evropa çempionatlarına. Bekleriz bizim çocuklarımızı üüsek ödüllärlän.
Foto preview bașkanın facebook sayfasından
Источник grt.md
