Çadir-Lunga monastırinä baaşlandı Panayıya «Troeruçiţa» ikonasının kopiyası
Orak ayın 24 — dä Çadır – Lunga kasabasında oldu haliz tarih olayı hem Gagauziyanın, hem da bütünnä Moldovanın pravoslav insannarı için. Dmitriy Solunskiy adına monastırinä baaşlandı Panayıya «Troeruçiţa» ikonası.
Panayıya «Troeruçiţa» ikonasının kopiyası, angısının originalı bulunêêr Afon bayırında Greţiyada, getirdilär Çadır kasabasına. İkona hep bulunacek Dmitriy Solunskiy adına monastırindä. Kendi gözlerinnän görmää ayozlu ikonayı hem pay almaa sırada onu monastırä götürärkana, geldi diil sade popazlar hem klise çalışannarı, ama kasabanın yaşayannarı da. İnsannar sayȇrlar, ani sade birlik hem inan Allaha yaardım edecek bu zoor vakıtlarda.
«Çok islää, ani getirdilär, çünkü bizim insan biraz azaldı gitmää kliseyä, taa çok işä bakêr, kazanmaa bakêr. Beki şindi taa çok insan gelecek, Allah bizi da işidecek da görecek».
«Allaah gösteerdi bizä ölä bir gözäl ayozluk, ani Afondan getirsinnär bizä bölä bir ikona. Bir büük baaşış bizä, insan lääzım bunu görsün, annasın da bu zor vakıtta gelsin kliseyä, gelsin Allaha».
«Şükür, ani büünkü gündä Allaah bizi topladı, kaaviletti bizim bacakları, bastonnan geldik. Şükür Allaha, ani gezdirer bizi da sevindirer. Allaah hepsinä versin saalık, uşaklarımıza da, fikirlesin kuvetleri da, doorutsunnar gazı da yaşamak ilerlesin. Kim bileer, ne verecek Allah ileeriya dooru, sevineeriz büünkü günä».
VALENTİN ORMANJI, Gagaziyanın şannı çalgıcısı: «Sanêrım, ani bu bir minune gibi, hem da insannara büük bir fayda olacek, kaavileşecek insannarın inanı. Sanêrım, ani çok faydalar olacek bu ikonadan, alışacek çok insan da kaavileşecek insanın inanı».
Finasladı ikonanın yazmasını Moldovanın yaşayanı Valeriy Efimov. İkonaynın monastırä baaşlamak olayını da hazırladı Gaydar küüyün yaşayanı Valeriy Kapsamun kafadarınnan.
VALERİY KAPSAMUN, Gaydar küüyün yaşayanı:«Görersiniz, pek büük kurak, görersiniz, cenklär olêr büük, insan kaybeler. Bizi Panayıya burada koruyacek, biz iki ateşin arasında bulunêêrız, şindi bu vakıt bizä pek önemli ani o bizi korusun, başka bizi yok kim korusun».
Çadır kasabasının popazı Dmitriy Solunskiy monastırindä sevineer, ani oldu kolaylık bolä ayozlu ikonayı getirmää. O sayer, ani bu iş kaaviledecek insannarın inanını.
NİKOLAY GENOV, Çadır – Lunga Dmitriy Solunskiy monastırindä popaz: «Biz var nicä her gün gelelim da yalvaralım ona, kimäsaydı versin saalık, kimäsaydı sabur, akıl. Sade lääzım inannan yaklaşmaa, dua etmää, da o verecek insannara ne onnar isterlär. Ama biz isteriz sölemää, ani Allahtan diil lääzım istemää baaşış, zenginnik. Lääzım istemää saalık, Allah prostetsin bizim günahlarımızı».
Bu baaşış büük bir sevinmelik bütün kasabaya, her bir insana. Bitkiyadan insannar inanmaazdılar, ani bölä büük ayozlu ikona Gagaziyaa gelecek.
İGUMENİYA ELİZAVETA, Dm. Solunskiy adına monastırin öndercisi: «Bana ilkin söledilär, benim inanacaam yoktu, ani bu bizä olacek. Kimseyä monaşkalardan da sölemedim, açan internetä koydular ani Afondan çikardılar getirerlar Moldovaya, Gagauziyaya deyni bu ikonayı, ozaman bän söledim matuşkalara, söledim insannara slujbada».
Panayıya «Troeruçiţa» ikonası yazıldı monastırin popazlarınnan, onnarın dualêrınnan hem kuvetlerinnän. Avva Mefodiy başarladı, ki ayozlu ikonayı Moldovanın pravoslav alkına versinnär.
Источник grt.md
