Beşgöz küüyünün yaşayanarı klisä kurbanında: “Küüdä hepsi islää, var nicä yaşamaa”
Orak ayın 12 -dä Beşgöz küüyün yaşayannarı klisä kurbanını nışannadılar. Nicä diişildi küü, hem yortunun önemliini küüyün yaşayannarından üürendi korrespondentımız Oleg Duloglo.
Beşgöz küü kuruldu 1811 yılda. Gözäl bir küü, kendi adetlerinnän anılȇr. Klisä kurbanını Beşgöz küüyünün yaşayannarı bakêrlar orak ayın 12-dä, Ayozlu Pötr hem Pavel günündä. Yortu çeketti sabaalen liturgiyadan.
Klisenin popazı Boba Pötr danıştı insannara Allaha inansınnar.
«Her bir gün, her bir insane kendi ruhunda götürer bir güreş esabı. Güreş iilin hem prostluun arasında. Umutlanêrım, ani Allahın yardımınnan, Kruçayı, ani Allahtan bizä verili, biz hepsimiz geçirecez».
Kutlamaa Beşgöz küüyün yaşayannarını klisenin kurbanınnan hem küüyün gününnän geldi Gagaziya Halk Topluşun başı Dmitriy Konstantinov.
«Göreriz, ani küüyün var gelecää. Onuştan bän pek sevinerim hem isteerim taa bir keret kutlamaa bölä gündä yaşayannarı. Saalık, bereket hem kısmet hepsinä».
Beşgöz küüyünün primarı Nikolay Gotişan danıştı insannara kutlama laflarlan.
«İsteerim kutlamaa hepsini kopkuyları, Kopkuyda yaşayan insannarı, kim var, kim Kopkuyda musaafir büün. Allah korusun onnarı, versin onnara bereket, saalık, varlık».
Küüyün yaşayannarı nışannadılar, ani küü ii tarafa diişti, küüyün kuvetleri dä, yaşayannarı da çalışêr ki küü ilerlesin.
«Uşak başçalarını düzerlär, şkolaları. Küüdä hepsi islää».
«Küümüz ii tarafa diişti. Gördüm kliseyi, pek gözäl yaptılar, yolları yapêrlar».
«Küüdä hepsi islää, hepsi var, var nicä yaşamaa. Ama pensiya küçük, islää olaceydı kaldırsınnar onnarı».
Beşgözün primarı Nikolay Gotişan çizgiledi, ani küüyüdä ilerleer çok taraftan önemli infrastruktura proektleri.
«Bu yıl sovedın nasaadına görä tamannayacez Sadovıy sokaanı, yapacez bir düzüntü orada hem bizim merkez Lenin sokaamızda da taa 320 metra. Yaptık büük bir düzüntü sportuçuların zalında, bizdä var neredä uşaklar güreşsinnär, diişsinnär, dinnensinnär. Taa bir proekt tamannadık bizim uşak başçasında. Yısıtmak sistemayı bütünnä enilenmesini tamannadık. Var taa proektlar, angıları ötää dooru çekedilecek».
Her yıl, adetlerä bakarak, en büük yarışmak turnirı olêr eldän elä geçän kuboona. Bu yıl turnirda pay aldı üç komanda, Djoltay, Kiriet-Lunga hem Beşgöz küüyü.
«Sevinerim, ani bizdä var kolaylık pay almaa bu yarışmakta».
«Bizi çaardılar, pek sevineeriz, ani bizi sayȇrlar, çaarȇrlar her bir yortuya, pay alêrız, dinneneriz».
Yarışmanın daavacısı İvan Kambur seviner, ani adet geçirmää bu turnirı korundu. İlk eri aldı komanda Djoltaydan, ikinci oldu Kiriet-Lunga küüyü, üçünçü oldu Beşgöz küüyü.
İvan Kambur: «Biz bu turnirı yapêêrız çoktan. Bıldır geldi 6-komanda, bu yıl geldi 2-komanda. Bıldır aldı Beşgöz kuboo».
Taa bir gözäl adet — erli kuvetlär yortu günündä baaşlȇȇrlar küüyün şannı yaşayannarını, sportuçuları. İnsannarı, kim braktı büük iz küüyün istoriyasında, ilerlemesindä. Dädular annattılar ilerki vakıtlar için.
Nikolay Stoyanov, Beşgöz küüyün aksakalı: «Gittim şahtalarda da işledim, bölä yaşamak yoktu hiç. Bir çanak unnan işläärdik kırda, ama şindi bän yaşêêrım nicä boyar. Hepsi var, saa ol uşaklarıma, hepsinä yaptım ev».
Aksakallar isteerlär, ki dünnedä olsun usluluk, da insannar raat hem birliktä yaşasınnar.
Pötr Gradinar, Beşgöz küüyün aksakalı: «Allah versin hepsinä yaşamak, usluluk olsun, raat yaşasın insan. Allah prost etsin bizi hepsimizi».
Yortu günündä Beşgöz küüyün yaşayannarına, musaafirlerinä erli kuvetlär kurdular yortulu sofrayı, sevindirdilär türlü sport olaylarlan, konţert programası geçti hem halk oyunnarı.
Источник grt.md
