Gagauziyaya baaşlanacek «Troeruçiţa» ikonası
Çoyu devletlerin monastırlerindä hem kliselelerindä bulunȇr Panayıya «Troeruçiţa» ikonasının kopyası. Bu Pazar günü Çadırda olacek haliz tarih olayı diil sade Gagauziyanın pravoslav insannarı için, ama bütün devlet için dä. Dmitriy Solunskiy adına monastırinä baaşlanacek Panayıya «Troeruçiţa» ikonası.
Panayıya «Troeruçiţa» ikonasının kopiyası, angısı verilecek Çadır — Lunga monastırinä, yazılıydı Serbiyada Hilandar monastırindä Afon bayırında. Finasladı ikonanın yazmasını Moldovanın yaşayanı Valeriy Efimov. İkonaynın monastırä baaşlamak olayini da hazırladı Gaydar küüyün yaşayanı Valeriy Kapsamun kafadarınnan. Baaşlayaceklar ikonayı monastırä Pazar günü orak ayın 24 — dä.
Olaylar, angıları bildirdilär Panayıyanın «Troeruçiţa» ikonasını, çekilerlär taa 8 – ci asirdän, o vakıtlar, açan güreşärdilär insannarlan, kimdä vardı ikona. Lev İsavr imperatorun askerleri gezärdilär pravoslav yaşayannarın evlerinä, bakardılar ikonaları, alıp yakardılar onnarı, insannarı da zeetlärdilär hem öldürärdilär. Sebep ondaydı, ani erideki halifanın ilk ministrusuydu, angısı pravoslavdı, bogoslovdu İoan Damaskın.
İoan Damaskın ondan sora, nicä aalaştı Panayaya duva ederäk, gitti ayozlanmış Savvanın monastırinä, neredä oldu inok. Hep burayı o getirdi ikonayı. Anmaa deyni bu olayı o yapıştırdı ikonanın aşaasına saa elin resimini, agısı yapılıydı gümüştän. Bundan sora o yazılȇr bu ayozlu simanın herbir ikonasında, angısı kabletti «Troeruçiţa» adını.
İkona bulundu monastırda 8-ci asirädän. Ondan sora nicä türklär girdilär Serbiyaya, pravoslav insannar istedilär onu korumaa, da baalayıp eşää kolverdilär onu kendi başına gitsin. Paalı ikonylan o etişti Afon bayırına da durgundu Hilandar monastırin tokatlarının önündä. Erli inoklar kablettilär onu nicä bir büük baaşışı, da o eri, neredä durgundu eşek ikonaylan, her yıl dolaylȇrlar kruçalarlan.
Gagauziyaya ikonanın baaşlamasından sora o hep bulunacek Dm. Solunskiy monastırindä da herbir insanın olacek kolayı gelip dua etmää onun önündä. İlk ona dua ederlär türlü hastalıklardan, malez baalı ellärlän hem ayaklarlan.
«Troeruçiţa» ikona koruyer insannarı, angıları zanaatlanȇrlar yaratma hem iinä işinnän. Maasus onu sayȇrlar resimcilär hem ikonaları yazannar. Ona danışȇrlar korumaa deyni ayleyi.
Источник grt.md 21.07.2022