Kıpçak küüyündä Koladayı kutladılar büük konţertlan
Büük ayın 8-dä Kipçak küüyünün Kultura merkezindä geçti Kolada konţerdı. Onu her yıl hazırlȇȇr Kıpçak küüyünün klisesi. Gözäl giimnar, dekoraţiyalar, meraklı programa — bunnar hepsi dokundu herbir siiredicinin üreenä. Onnarın arasındaydı bizim çalışannarımız.
Kolada konţerdı Kıpçak küüyündä her yıl hazırlanȇr erli klisenin çalışannarınnan hem ürenicilerinnän. Her keret konţert toplȇȇr bütün küüyü Kultura evindä. Konţerdın programası pek meraklı olȇr dokunarak insannarın üreklerinä, onuştan hepsi siiredicilär bakȇr onu bitkiyadan. Kıpçak klisesinin ürenicileri nışannadılar, ani büük havezlän hem sevgiylän hazırlanȇrlar bu yortuya.
«Biz isteeriz herbir insan kendi içindä kabletsin duumuş Hristozu, onuştan biz savaşȇrız yapmaa bu yortuyu, da insannar bu dünnedä düşünsünnär diil sade dış iiliklär hem kolaylıklar için, ama ruh zenginnii için da. Biz isteeriz insannarı getirmää Allaha hem da açmaa onnarın üreklerini».
«Biz bütün üreklän, sevineräk geldik bu konţerda, neçin deyni birkaç yıl olmadı bu konţert. Düşünerim ani ötää dooru taa zeedelenecek bizdä uşak klisedä, taa zeedä konţertlar da olacek. Olsun usluluk bu dünnedä, saalık hepsiciinä hem Hristoz olsun bizimnän bilä».
«Bu yortu büük bir yortu hristiannarda, lääzım bakılsın, adetleri lääzım bastırmayalım, biz lääzım gidelim ileri, biz gagauzuz, taa sıkça bölä olaylar olsun. Çok büük saygım, duygum var bizim popazlara».
Konţerdın programası meraklıydı hem kapladı türlü janralarda hazırlanmış gösterileri: türküleri diiştirärdilär teatro gösterileri. Kıpçak Kultura evi doluydu insannan, ne gösterer, nekadar diidi insannarın üreklerinä bölä konţertlar.
«Allah iner erä insan gibi, ani yaşamaa insannarın arasında da insan olsun Allah gibi. Bu konţert yapılȇrdeyni toplamaa hepsini bir erä. Allah o birlik, ölä isteer ani insan olsun, açan bizim aramızda var annaşmak, bizdä var birlik, bizi yok nicä üstelesin bişey, biz ozman varız Allahın sevgisi», — nışanadı Kıpçak klisesinin popazı Födor Karakalçev.
Sţenkaları, türküleri uşaklar gösterdilär siiredicilerä rus hem gagauz dilindä. Konţerttä pay aldılar 200-dän zeedä Kıpçak klisesinin ürenicisi.
Avtor: O. Duloglo, video hem montaj: L. Arfanos
Источник grt.md
