Bulgar dilini üüredän Gagauziyanın hem Tarakliya dolayın okulları hem yaslaları kablettilär eni tehnikayı
Bulgar üüredicilerin asoţiaţıyası taradı proekti, angısına görä bulgar dilini üüredän Gagauziyanın hem Tarakliya dolayın üüretim kurumnarı kablettilär eni tehnikayı. Bulgariyanın dış işleri bakannıı verdi 13 bin 595 evro ki bu okullar için satın alınsın 21 notebook. Gagauziyanın üüretim kurumnarı artık 10 parça kablettilär. Komrattakı N. Tretyakov adına liţeyi başladı eni tehnikayı kendi işindä kullanmaa.
Zamandaş üüretim sistemasına görä herbir üüredici ister — istemäz kendi işindä modern avadannıkları lääzım kullansın. Eni notebook ilinnedecek üüredicinin işini hem meraklandıracȇk uşakları keyflän üürenmää bulgar dilini, sayȇr N. Tretyakov adına liţeyin başı Polina Pıntä.
«Büün biz annȇȇrız, ani lääzım bu günä görä zamandaş dersleri hazırlayalım. Esap aldık, ani uşaklar eni bilgileri taa islää aklında tutêrlar, açan kullanȇrız IT tehnologiyaları. Bizim da işimiz taa ilinnener. Var nicä evdä raat işleyelim, fleşkada eni dersi getirdik, gösterdik. Taa az vakıt harcȇȇrız», — anattı Polina Pıntä.
Liţeyin 4-cü klasta üürenän uşakalar nışannadılar, ani beenerlär, açan derslerdä üüredici gösterer prezintaţiyaları hem videoları, ozaman onnar taa ii annȇȇrlar dili. Derslär da taa meraklı hem faydalı geçerlär.
«Bän beenerim bizim bulgar dili derslerini. Şindi taa çok prezentaţiya bizä göstereceklär. Bölä taa islää bulgar dilini bilecez».
«Biz klas ortaklarımnan severiz bölä dersleri, açan bizä göstererlär videoları hem prezentaţiyaları».
«Bizim derslerimiz olacȇklar hem meraklı, hem dä bilgilendirici. Umutluyum, ani şindi taa çok video hem prezentaţiyaya görä üürenecez».
Komrattakı N. Tretyakov adına liţeyindä 188 uşak üürener bulgar dilini. Üüretim kurumunda 1-ci klastan 12-ci klsadan bulgar dili grupaları var. Yıl-yıldan isteyennerin sayısı bulgar dilini Ana dilini olarak üürenmää zeedelener, nışann liţeyin başı Polina Pıntä.
Avtor: M.Topal, video: F.Çakusta, montaj: A.Topal
Источник grt.md 17.12.2022