Valkaneş Doljnenko adına liţeyi kabletti uşakları Ukrainadan
Hergün avtonomiyaya Ukrainadan uşaklar kendi aylelerinnän gelerlär, kimi onnarın arasından kendi başına sınırı geçerlär. Gözletmelerä görä, onardan taa çoyu okullarda üürenerlär. Birkaç gün geeri onnar kendi Vatanında şkolaya gezärdilär, ama bir kıpımda hepsi diişildi, onnar zorlan kendi duuma erini braktılar. Gagauziyanın üüretim kurumnarı vererlär kolaylıı bu uşaklara ilerletmää üürenmeyi. Valkaneş kasabasının A.Doljnenko adına liţeyi kabletti 9 uşaa. Onnar gelerlär okula sesleyici olarak. Nota onnara koymȇȇrlar. Uşaklar ana üüretim kurumnarın onlayn derslerini da var nicä seslesinnär.
Ukrainda cenktän kaçan insannarın uşaklarını kablettilär Valkaneş kasabasında Aksenty Doljnenko adına liţeyinä. Onnar tez üüretim proţesinä katıldılar.
Korkunçlu durumun beterinä Odessa kasabasında Aleksey hem onun kardaşı Georgiy geldilär Gagauziyaya. Kardaşlar Valkaneştä yaşȇȇrlar kendi dostlarında Avtonomiyaya onnar geldilär ikisi, anası hem bobası kaldılar Ukrayınada. Kasabanın üüretim kurumuna taa geldiynän Aleksey danışmayı yolladı, ki küçük kardaşı kaçırmasın okul zamanını.
“O beendi liţeyi. Kardaşım savaşȇr bu programayı üürenmää hem sınaşmaa eni üüredicilerä. Kısa vakıtta dost ta kendisinä buldu. Biraz zor dillärlän, ama ona yardım ederlär. Bän dä savaşȇrım üürenmää dili, ki gelecektä işä girmää deyni», — annattı Aleksey.
Gagauziyanın üüretim kurumnarün üürenicileri hem üüredicilär sıcak kablettilär Ukrainadan kaçan insannarın uşaklarını, nışannadı Valkaneş kasabasının A.Doljnenko adına liţeyin başı Larisa Bozbey.
«Bizim liţeydän uşaklarlan lafettik, ki kursunnar Ukrayınanın uşaklarına deyni ugun atmosferayı. Onnarın aklılarına getirmesinnär çirkin oluşları , angılarını onnar geçirdilär. İlk kıpımdan taa islää katıldılar üürenicilerin arasına, üüretim proţesinä. Şansora, iki afta geçti, nicä onnar üürenerlär bizdä. Artık buldular kendilerinä dost diil sade kendi klasın aarasında, ama başkalarından da . Bölä baalantılar açȇrlar uşakları ,onnar kendilerini serbest duyȇrlar», — annatı liţeyin başı.
Ama bir taraftan liţeyin öndercilii bir sıra problemaylan karşı geldi, üüretim proţesini hazırlayarkana Ukrayınadan uşaklara deyni. Onnarı pay ettilär klaslara yaşa görä, ama esaba alınmadı onnarın Ukrayınada üüretim programası. Şindiki zaman üürenicilär diil üürenici ama sesliyici olarak okula gelerlär. Bununnan birerdä bu uşaklar kendi üüretim kurumuna online baalanȇrlar.
«Ukrayınadan uşklara üüredicilerimiz onnara yardım ederlär ev işlerini hazırlamaa. Bir dä üüredici geeri çevirmedi uşakları, kimä lääzım oldu yardım ettilär», — söledi Larisa Bozbey.
Bundan kaarä liţeyin başı Larisa Bozbey nışannadı, ani üüretim kurumunda psihologlar çalışȇrlar, onnar var nicä professional uurunda yardım versinnär Ukrayından gelän uşaklara.
Источник grt.md
