Başkan annaştı Rusiyadan can efirini göstermäk için [ÇW4]
Geçän perşembä, Rusiyaya bir çalışmak yolculuunu yaparkan hem kendi rus paşaportlarını eniledärkän, Gagauziyanın Başkanı hem Bakannık komitetindän taa 17 müdürlär İM “Skolkovo”-ya vizit yaptılar.
İnovaţiya Merkezindä, liftä birliktä pinän, Yönetim Kurulu Başkanı Viktor Vekselberglan kısa bir toplantı yapıldı. Bu rastgelişi faydalı kullanıp Irina Vlah çeketti kötülemää Moldova hukumetini, ki onnar bizdä rus propagandasını zap ettilär.
Bunun yanında, Başkan ekledi umudunu ani Vekselberg duyucek gagauzların dualarını hem onnara yardımcı olacek:
"Düşünerim, ani Gagauziyada katastrofik olarak rus televiziyasını etişmeer. Gagauz halkında laazım olsun kolaylık pak hem problemsız Putini siyretmää".
Viktor Vekselberg, utanarkan sorup SİRİ’ya “gagauzlar kimdir”, verdi söz ani gagauzlara mutlaka yardım edecek. Bundan sora, İrina Vlahının selfi-sessiyasından kurtulup, Vekselberg yolladı bütün delegaţiyayı Skolkovo sergi salonuna.
Sergi salonunda, gagauz elçileri rusların en modern tertibinnän tanıştılar, onun adı - PROPAGANDASKOP. Prinţip hem sadä hem da ustaca yapılmış: Rusyadan eraltına, Ukrayna altından, bir çıkışı Kremlä, öbürü Komrata gidän bir periskop trubası koyulacek. Bölä, Moldova kanunvericiliini hiç bozmadan, Gagauziya kableder bir pak kanal, angısında var nicä hersaatlan Putini siyretmää çünkü bu propagandaskop halizdän televiziya diildir.
Şu zamanda, gagauz müdürlerinä teklif ettilär birkaç improvizat transläţiya siyretsinnär. Birinci transläțiya parasız, bütün gün Putinin kabinetini gösterärmiş. Kalannar sa sadece abonamentlän gösterilebilecek: birinci transläţiya LUX, Gelindjiktä bulunan Putinin binasındakı aqua-diskotekaya çıkêr. İkinci periskop – BDSM sevennerä deyni: çıkêr zındana, neredä bulunêr Navalnıy.
İrina Vlah Skolkovo Merkezinin çalışannara şükür ettiynän, verdi onnara “Propaganda gelişiminä katkı için” çokolata medallerini. Şindi sä, bütün Gagauziyada propagandoskop’u görsünnär deyni, GAGAUZINFO temelindä taa bir yan media-firma açılacek.
+1
