Başkan Ukrainanın vatandaşları için Moldovada: “Lääzım düşünelim, nicä bu insannarı cümnemizin bir payı yapalım”
Devletlerin öndercileri aralarında kavga — herzaman prost. Ukrainanın hem Russiyanın aralarında durumda bir çıkış var — dialog. Lääzım annaşmaa hem düşünmää o insannar için, angıları orada yaşȇȇrlar. Bunu açıkladı Gagauziyanın başkanı İrina Vlah GRT kanalında “İntervyu nedeli” programasında.
Moldovaya Ukrainadan cenk olayların çeketmesindän 101 bin insandan zedä geldilär. Onnarın arasında var 49 bin uşak.
Devletin merkezlerindä 4 bin insandan zeedä erleştilär, taa çoyu onnardan karılar hem uşaklar. Devletin yaşayannarı kalmadılar bir tarafta da bütün ürektän yardımnan karşıladılar onnarı, açıkladı Gagauziyanın başkanı İrina Vlah.
«En ilkin biz yalvardık insannara yardım etsinnär rubaylan, ayakkaabıylan hem, kimin var kolayı, ellerinä alsınnar. Büün biz annadık, ani bu insannara deyni başka koşulları lääzım kuralım. Lääzım düşünelim, nesoy var nicä yapmaa ölä, ani onnar bizim cümnemizin bir payı olsunnar», — söledi başkan.
Ukrainadan gelennär var nicä kabletsinnär iş Moldovada, uşaklar da yakışȇr gitsinnär şkolalara hem uşak başçalarına.
«Düşünerim, ani Hukumet uurunda lääzım olsun bir dokument, angısı verecek kolaylık işletmää belli adımnarı, angıları vereceklär kolaylık bu insannara duymamaa kendilerini yabancı bizim aramızda. Lääzım kurmaa koşulları, angıları yardım edeceklär onnara bizim devletimizdä bulunmaa», — söledi avtonomiyanın başı.
Avtonomiyada bu insannar Kongaz hem Kirsovo küülerin merkezlerindä erleştirerlär. Kirsovo küüyündä büün var 35 karı, ta çoyu onnardan küçük uşaklarlan, nışannadı İrina Vlah.
«O sıcaklık, angısını verdilär bu insannara küüyün yaşayannarı – paasız. Onnar şükür ederlär Kirsovo küüyünün yaşayannarını bu sıcaklık için. Onnar savaşȇrlar vermää Ukrainalılara o koşulları, angıları yardım edeceklär, makar bir kıpıma, unutmaa Ukrainada olan olaylar için», — nışannadı İrina Vlah.
Kongaz küüyünün merkezindä büün var 100 kişidän zeedä. Bu sayı her gün diiyşer, çünkü taa çoyu insannar kalȇrlar orada sade bir-iki günä.
Источник grt.md
