«At – Prolin» Çadir – Lunga primariyasının varlıı olacek
Çadır – Lunga munuţipal soveti büün geçirdi maasuz oturuşu, angısında bakıldı saade bir soruş, angısı baalı «AT – PROLİN» kurumun geçirilmesinnän Çadır – Lunga kasabasının primariyanın varlıına. Temayı ilerleder Polina Barbova.
Çadır – Lunga munuţipal sovetin oturuşun maasuz geçirilmesi baalı onunnan, ani primariya hazır kabletmää «AT – PROLİN» kurumunu primariyanın varlıına saade o zaman, açän Gagauziyanın büdjetından 2022 – 2023- cı yılların ikinci paylarından verilecek para kurumun çalışması için. Ama 2024 – cu yılın büük ayından erli kuvetlär makarki biraraz finanslayaceklar bu kurumu, haberledi Çadır – Lunganın primarı Anatoliy Topal.
ANATOLİY TOPAL, Çadır – Lunga kasabasının primarı: «Bu vakıdın içindä, deecez 1, 5 yılın içindä yapmaa işleri diişilmekleri kurumun kullanmasında. Büün bu devlet kurumu, angısı için pek canımız acer, ani brakmȇr 100% finanslamaa bölä uurda obyektleri. Lääzım olsun nesoysa payı, ki kurum kendi başına para kazansın».
Kurumun varlıın diişilmäk formasına o olacek cümnä krumu, angısı kazanabilecek para turistlerdän, beygirlerin yarışmalarından, at üstü gezmäk derslerindä hem da nesoysa mediţina koşularında. Bu bütün spektr, nedä lääzım olaceklar uzmananar çalışsınnar, çizgiledi Anatoliy Topal. Bu soruş bakıldı bu günnär Gagauziyanın Halk Topluşunda da, haberledi primar.
ANATOLİY TOPAL, Çadır – Lunga kasabasının primarı: «Bu olacek bir komissiya, angısı işlettirecek kurumun mehanizmasını, formasını, ki o kalsın devlet kurumu, ama olacek kolaylı kazanma da. Ama ne etişmeyecek , nesoysa payı geçirecek erli büdjet, herlim 2024 – cu yılda kurumu kabledärsaydık balansa, diiştirmää deyni çalışmasını. Kasabanın nasaatçiları kontrol edeceklär kurumu, deecez, nicä harcanȇrlar paralar».
Gagauziyanın Halk Topluşun başın yardımcısı Georgiy Leyçu nışannadı, nedän peydalandılar soruşlar avtonomiyanın kanondakı bölümün uzmannarında.
GEORGİY LEYÇU, Gagauziyanın Halk Topluşun başın yardımcısı: «Proektin giriştirilmesi için biz işittik saade o zaman, açän Gagauziyanın bakannık komiteti danıştı bizä ki vermää onnara izin vermää deyni kontribuţiya sayıda 2 million ley. Elbetki, deputatlarda peydalandılar pek çök soruşlar, bileräk cümnenin istediklerini, bu sirada Çadır — Lunga kasabasının yaşayannarında da. Bu variant nasaat edildi Gagauziyanın bakannık komitetinnän taa baştan. Da şükür Allaha, ani nasaatçilar geldilär dooru karara. Butakım biz koruyȇrız kurumu, biz vereriz para da».
Çadır – Lunga muniţipal sovetin azaları kayıl oldular «AT – PROLİN» kurumun geçirilmesi için primariyanın varlıına gelän finanslamaklan Gaguziyanın büdjetından 2024 – cu yılın büük ayınadan. Bu soruş için hepsi azalar seslerini verdilär.
prevyu traveltimes.ru
Источник grt.md 04.08.2022