Çadır-Lunga soveti danıştı deputatlara tuttursunnar “At Prolin” turistik kompleksin düzülmesi proektini
Çadır kasabasının nasaatçıları maasuz oturuşunu geçirdilär. Onun süresindä onar baktılar soruşu, angısı baalı GHT danışmaklan. Ne iş için yazıldı bu danışmak, annadı AlönaTerzi.
Nasaatçılara bakılmaya teklif edildi sade bir soruş, angısı baalı GHT danışmaklan “At Prolin” turistik kompleksin düzülmesi proektinä kontribuţiya vermesi için. Proektin bütün paası 17 mln.199 bin ley kurȇr, bakannık komitetin kontribuţiyası 1mln.900 bin ley lääzım olsun.
Konstantin Keleş, “At Prolin” fermasının öndercisi: “Korumaa deyni bu kurumu biz pek çok düşündük. Çok iş yapıldı proekti yapannarlan. Bitki-bitkiyä biz inandırdık onarı, ani bu proekt lääzım bizä”.
Nikolay Kiseev, Çadır-Lunga kasabasının nasaatçısı: “Biz kaybedärseydik büün bu proekti, islää olmayacek. Diil önemli kim orada ötää dooru işleyecek, önemli o, ani bu kurum bizim kasabamızda kalacek”.
Bu proekt geçti MD çiftçilik, regional ilerlemesi hem dolay ortamı ministerliindän hem koyuldu “2022-ci-2024-cü yılların programası dokumentinä”. Bu dokumentä kayıllıını verdi MD Finans Ministerlii hem finanslanacek Regional ilerlemesi Millet fondunnan.
Natalyä Novaçlı, Çadır-Lunga kasabasının nasaatın başı: “Bän isteerim danışmaa deputatlara işitsinnär nasaatçıları hem versinnär bu kontribuţiyayı. Neçin deyni devlet baaşlȇȇr bizä bu paraları”.
Nikolay Mihalçenko, Çadır-Lunga kasabasının nasaatçısı: “Eer bu kontribuţiya verilmärseydi, Gagauziya kaybedcek bu paraları. Yollayalım deputatlara bir danışmak, ki onnar maasuz bir oturuşa toplanıp kabletsinnär bu soruşu”.
Muniţipiyanın primarı nışannadı, ani bu proekt önemli diil sade Çadır kasabasına deyni, ama bütün devletä deyni dä.
Anatoliy Topal, Çadır-Lunga kasabasının primarı: “Bän bilerim, ani HT deputatları kabledeceklär bu soruşu, nicä dä vakıdında onnar kablettiydilär Fujikuranın düzülmesi için 12 mln. leyin verilmesi proektini. Bu soruş ekonomika hem turism ilerlemesininnän baalı hem verecek kolaylık iş erlerin açılmasına da”.
“At Prolin” beygir ferması kendi soylu atlarınnan anıldı diil sade Gagauziyada hem Moldovada, ama bütün dünnedä. Bu proektin gerçeklenmesi verecek kolaylık taa geniştän hem professional uurunda at sportunnan zanaatlanmaa. Bundan kaarä burada plannȇȇrlar geliştirmää ipiterapiya ilaçlaması kolaylıklarını da.
Источник grt.md
