Çadır – Lunga bolniţasına verildi 300 million ley derindän remont işlerinä
Gagauziyanın vatandaşı Mihail Vlah kendi facebook sayfasında erleştirdi fotoları, angılarında gösterili Çadır – Lunga dolay bolniţasının duudurmak bölümün koşularınnan baalı problema. Bu günnerdä bizim televizion grupamız bulundu medik kurumunda hem yakından tanıştı durumnan.
Çadır – Lunga dolay bolniţasının öndercisi Natalya Popazoglo nışannadı, ani fotolar, angılarını erleştirdi Gagauziyanın cümnä aktivisti Mihail Vlah, açıklȇȇrlar problemayı, angıs vardı medik kurumun perinatal merkezindä. O çeketti çalışmaa taa 1990 – ci yıllardan beeri, da o zamandan orada yapılmadı derindän remont işleri. Gagauziya Bakannık komiteti karaladı vermää 3 million ley remont işlerini perinatal merkezindä yapmaa. O bulunȇr yapının 3 – cu katında. 2021 – ci yılda yaz zamanında çekedildilär derindän remont işleri, koronavirus pandemiyanın beterinä onnar uzandılar.
NATALYA POPAZOGLO, Çadır – Lunga dolay bolniţasının öndercisi: «Hepsiniz bilersiniz, nesoy halda bulunȇr bizim devletimizdä ȇkonomika durumu, düzmäk tedarıklarına paalar üüsek. Düzücülär adȇrlar, ani bu yıl biz geçecez bu binaya, da bizim kolayımız olacek insannarı burada kabletmää, da burada duaceklar eni insannar, islä, kaliteli koşullrda».
Çadır – Lunga dolay bolniţasının yapısının hayatlarında şindän sora bulunȇr eni mobila tedarıkları palatalar için.
NATALYA POPAZOGLO, Çadır – Lunga dolay bolniţasının öndercisi: «Bakmadaan ona, ani derindän remont işleri başarılmadılar, binada şindän sora var mobila tedarıkları, taa yapılȇrlar avadannıklar perinatal merkezi içn. Sanȇrım, ani o zamanadan, açan başaranaceklar derindän remont işleri, biz getirecez hepsi lääzımnı tedarıkları da dolduracez bizim 3 –cu katı: duudurmaktan sora bölümä hem kalın karıların patalogiya bölümünä hepsi lääzımnı avadannıkları erleştirecez».
Şindiki zamannar perinatal merkezindä giderlär ilk ȇtapın derindän remont işleri. Orada erleşeceklär ginekologiya bölümü, kalın karıların patologiya hem duudurmaktan sora bölümneri. İkinci etapa görä düşünüler yapılsınnar derindän işlär duudurmak hem operaţiya bölümnerindä. Paralar, derindän yapılmak işleri için perinatal merkezindä verildilär Gagauziyanın büdjetından, haberledi Çadır – Lunga kasabasının primarı Anatoliy Topal.
ANATOLİY TOPAL, Çadır – Lunga kasabasının primarı: «Nicä primar sayȇrım, ani her bir proekt, angısı yapılȇr muniţipiyada, primariya lääzım katılsın ona. Bütündän, büünkü günnär baalantılar aramızda var. En önemli o, ani her bir proekt, angısı giriştiriler bolniţanın dolayında, o maasuz lääzım doorudulu olsun hastalar için . İnsan lääzım gelsin, da kabletsin lääzımnı yardımı».
Çadır – Lunga dolay bolniţasının perinatal merkezindä derindän remont işleri plana koyulu bu yılın bitkisinädan başarmaa. İnsannar için hem uzmannar için olaceklar hepsi lääzımnı koşular.Mediţina kurumun administraţiyası bekleer eni tedarıkları, angılarını lääzım getirsinnär aftanın bitkisinädan.
Источник grt.md 18.08.2022