Çadır-Lunga muniţipiyasının kultura merkezindä düzmäk işleri geçiriler
Angı etapta onnar bulunȇrlar hem nesoy çıkış beklemekleri merkezin başı Jana Paşalı paylaştı.
Odun kokusu, çokan urması hem bolgarkanın işlemesi – hepsini bunu vardı nasıl duymaa hem işitmää Çadır-Lunga kultura merkezindä bu yaz günü. Yapıda erlerin, sţenanın hem kreslaların kapital düzmäk işleri geçiriler. Nicä paylaştı kultura kurumun öndercisi Jana Paşalı, polun döşemesi burada taa yapının açılmasından 1970-ci yılların bitkisindän diiştirilmedi.
JANA PAŞALI Çadır-Lunga muniţipiyasının kultura merkezin başı : — «Odundan pol, angısı taa 1978 yılda yapıldı, o vakıt açan Kultura merkezi ȇkspluataţiyaya verildi ii kullanıldı hem bizim artistlärlän hem kasabanın yaşayannarınnan, angıları burayi türlü yortulu olaylara gelärdilär. Ama bu pola 40 yıldan zeedä. İnsan, kim eski odunnarı ondan çıkarardı, esap aldı, ki yapılıydı vakıtçasına pek kaliteli».
Düzmäk işlerin üüsek kalitesinä hem uzun kullanılmak vakıdına şindi dä kultura merkezin öndercisi umutlanȇr. Zalanıl polun hem sţenanın yapılması için zamandaş materiallar hem tehnologiyalar kullanılȇr.
JANA PAŞALI Çadır-Lunga muniţipiyasının kultura merkezin başı : — «İlk kat ţement döküler, sora laga koyulȇr, nedän sora sţenanın üstü maasuz hazırılmış, kuru odundan döşeniler. Diil boyalı ama nesoy standartlara görä Kultura evlerin sţenaların üstü yapılȇr».
Önemli işlär zalada da geçiriler, neredä hem polun döşemesi enilener hem dä kreslaların düzülmesi dä yapılȇr.
JANA PAŞALI Çadır-Lunga muniţipiyasının kultura merkezin başı : — «Bütünnä kreslaların üstünü eni materiala diiştireriz, bundan kaarä, neredä lääzım faneraları hem odun parçalarını da enilederiz. Bütünnä diiştirmää kreslaların konfiguraţiyasını hem materiallarını plastmasaya ya kompozit materialına düşünmeeriz, neçin ki eski kreslalarımız ölä dä yakışıklı. Onnarı şindän sora 40 yıldan zeedä kullanȇrız».
O zamandan sora, nicä polun üstünü eni oduna diiştireceklär, kendi erlerinä kreslalar da koyulacek. Nicä nışannadı düzmäk firmanın çalışanı, hepsi işlerin yarısından zeedesi şindän sora yapıldı.
VÄÇESLAV ORMANJI düzmäk kurumun çalışanı : — «Orak ayın 20-dän işleri başladık, sţenanın üstünü çıkardık, polların üstünü skaunnarın altında hep ölä. Büünkü gün 60 proţentän zeedä işleri geçirdik».
İlk yortu ,angısını plannanȇr geçirmää eni düzülü zalada, paylaştı kultura merkezin başı, o «Gagauz sesleri» festivali, o adetçä Çadır- muniţipiyasında her yıl yapılȇr.
Источник grt.md 29.08.2022