22 yıl geri Gagauz radiosu Türkiyenin yardımınnan çıktı kendi ilk yayınına
Haliz Gagauz radiosunun yayınında Gagauziyanın yaşayannarı var nicä seslesinnär haberleri hem başka türlü programaları ana dilindä. Gagauz radiosu ilk yayınını gerçekleştirdi 22 yıl geri, Mayın 12-dä. Ozaman, Türkiyenin yardımınnan hem avtonomiya önderciliin çalışmalarınnan gerçeklendi o vakıtlarda inanılmayan iş – yayına çıktılar Gagauziyada olan olaylar için haberlär gagauz hem rus dillerindä.
Büün radio çalışannarı kablederlär kutlamaları. İlk, kim diledi radioya ii başarları, oldu GHT başının yardımcısı Nikolay Ormanjı.
“İsterim dilemää hepsinä kuvet, siz yapȇrsınız büük işi. Sizi insannar sesler”, — nışannadı Nikolay Ormanjı.
Kutlamklarlan hem dileklärlän üüsek uurda ileri dooru da çalışmaa hem haberlemää insannarı her gün, danıştı cümnä kompaniyasının gözledici sövetin başı Mihayıl Vlah.
“Kim dä ne sölämesin, radio hem televideniye çalışȇrlar kendi kolaylıklarına görä. Da Mariya Dmitrievna urguladı, ani 22 yıl geeri, 2000 — ci yılda az kim inanardı, ani bölä üüsek uurda çalışacek radio. Beenerim radionun tanılan reklamasını, ani dünneyın en ii radiosu. Biz halizdän ölä sayȇrız. Nicä bizim kollega söler, ani o en ii dünnedä, o ölä da var. Onun için gözledici sovetin adından isteerim dilemää sizä kısmet, usluluk. İsterim, dostlar, dilemää sizä, ki o kuvetlär, angıları sizdä var, taa ii olasınız”, — söledi Mihayıl Vlah.
“GRT” kompaniyasının başının erinä çalışan hem radinun baş redaktoru Galina Maresyeva diledi hepsinä saalık, kısmet hem zanaat uurunda ii başarlar.
“İsterim esaba aldırtmaa, ani maasus 2000 yılda 22 yıl geeri oldu revolüţiya Gagauziyada, radio tel balaantısından geçti eni tehnologiyalara. Biz çekettik yayınamaa taa büük diapazonda. Da o zaman türk tarafının yardımınnan, avtonomiyanın yardımınnan hem insannarın, angıları kurdular radioyu, büün bizdä var GRT hem radio onun içindä. Da te 22 yıl biz çalışȇrız. Çekedärdi ozaman Mariya Dmitrievna, Ekaterina Manita, Natalya Andrieş. Ama hepsinä isterim dilemää kuvet, saalık, çünkü onunnan baalı bizim işimiz da. Da biz kuralım ii keyf, götürelim kolvermeleri gagauz dilindä”, — söledi Galina Maresyeva.
22 yıl — diil az vakıt, alındılar büük “bayırlar” geçildi hepsi zorluklar kolektivlan. Radio kurucusunun hem ilk başının Mariya Parfönovanın laflarına görä, yapıldı pek çok, ama var taa nelär yapmaa ileri dooru ki sevindirmää sesleyenneri.
Hergünkü kolverimlär, programmalar, çoyu onnardan çıkȇrlar cannı yayında Gagauziyanın yaşayannarına deyni. Gagauz radiosu birleştirer insannarı. Diil çoktan kuruldu cümnä tolumu “Radio dostlar”. Birkaç karı türlü yaşamak erlerindän, angıları bilmediynän biri-birini, yollȇrlar selämnarı biri-birinä, kaldırıp insannarın keyfini.
Sesleyennerin notaları en büük baaşış radio izmetçilerinä. Onnar vererlär stimul, kanatlandırȇrlar jurnalıstleri nelär sä eni yapmaa onnara deyni.
Yortunuzlan sizi, kollegalar!
Источник grt.md
