Gagauziya Radio Televizionun kendi gimnı peydalandı
Gimnlar var diil sade devletlerin, ama kasabaların, küüyülerin dä. Var onnar türlü kompaniyalarda da, ya da cümneya deyni önemli olaylara baalı, bölä muzika kompoziţiyalar öterlär türlü yortularda. Şindi GRT cümnä kompaniyasının da gimnı var. Nicä o kurulardı, Natalya Andrieşın materialında.
Bölä yaratmalarda açıklaner kurumnarın davaları hem neetleri. Büünkü gün GRT cümnä kompaniyası o ikinci kompaniya devlettä, angısı işleer teleradio yayını için Kanonuna görä. İdeya yazmaa GRT-nın gimnını vardı çoktan, ama 15-ci yıldönümü, nicä kompaniya cümnä statusunu kabletti, hızlandırdı bu proţesi, annader radionun redaktoru, gimn lafların avtoru Mariya Parfönova.
Mariya Parfönova nışannadı, ani gimnın yazmasında pek zordu gagauz dilindä bulmaa o lafları, angıları gösterebileceydilär kompaniyanın işini.
İlkin yazıldılar gimnın laflarını, annattı Mariya Parfönova, sora da muzika yazıldı. Bu yapıldı, ki doludan göstermää hepsi duyguları.
Muzikanın avtoru, Gagauz radiosunun yayın rejissöru Pavel Arnaut annader, ani ona danıştılar yazmaa muzikayı, ama laflar ilkin yoktular. Onuştan zordu. Ama Pavelda vardı birkaç hazır kompoziţiya.
Brakıp hepsi işlerini bir tarafa, Pavel oturdu muzikay yazmaa. Da üç — dört gündän sora o ava peydalnadı.
Muzika hem laflar yazıldılar. Kalktı soruş — kim çalacek gimnı? Radionun kolektivi çok düşündü da geldilär çıkışa, ani GRT cümnä kompaniyasının gimnını lääzım Dima Jelezoglo çalsın. Onnan barabar gimnı çalacek radionun işçisi Mariya Kösä, açıkladı Mariya Parfönova.
GRT cümnä kompaniyasının gimnı ötecek oktäbrinin 29-zunda — o gündä, açan 15 yıl geeri kompaniya kabletti cümnä statusunu.
Reportör: Natalya Andrieş
Video: Vlad Tabaçük
Montaj: Aleksey Gerçü
Источник grt.md 26.10.2022